கூடலூர்,

கூடலூரில் சக்தி முனீஸ்வரர் கோவில் ேதரோட்டம் நடைபெற்றது. இதில் ஏராளமான பக்தர்கள் கலந்துகொண்டனர்.

சக்தி முனீஸ்வரர் கோவில்

கூடலூர் அரசு மாதிரி மேல்நிலைப்பள்ளி அருகே ஸ்ரீ சக்தி முனீஸ்வரர் கோவில் உள்ளது. இக்கோவிலில் தேர் திருவிழா கடந்த 20-ந் தேதி தொடங்கியது. இதையொட்டி காலை 5 மணிக்கு மகா கணபதி ஹோமம், 7 மணிக்கு கொடியேற்றுதல் நிகழ்ச்சி, தொடர்ந்து சுவாமிக்கு அபிஷேக அலங்கார சிறப்பு பூஜை, மதியம் 12 மணிக்கு உச்சி கால தீபாராதனை காண்பிக்கப்பட்டது.

காலை 6 மணிக்கு திருவிளக்கு பூஜை, தொடர்ந்து விசேஷ பூஜைகள் நடைபெற்றது. 21-ந் தேதி காலை 6 மணிக்கு அபிஷேக அலங்கார சிறப்பு பூஜை, 10 மணிக்கு மூலவர், கால பைரவர் உள்பட பரிவார தெய்வங்களுக்கு விசேஷ பூஜைகள் நடைபெற்றது. மதியம் 12 மணிக்கு மகா தீபாராதனை காண்பிக்கப்பட்டது. மாலை 6 மணிக்கு அலங்கரிக்கப்பட்ட பல்லக்கில் ஸ்ரீசக்தி முனிஷ்வரர் எழுந்தருளி வீதி உலா வருதல் நிகழ்ச்சி நடைபெற்றது.

திருத்தேர் வீதி உலா

இந்தநிலையில் நேற்று காலை 6 மணிக்கு அபிஷேகம், காலை 11 மணிக்கு கூடலூர் சக்தி விநாயகர் கோவிலில் இருந்து பெண்கள் பால்குடம் எடுத்து முக்கிய சாலைகள் வழியாக கோவிலை வந்தடைந்தனர். தொடர்ந்து மூலவருக்கு பாலாபிஷேகம் நடைபெற்றது. பின்னர் சிறப்பு அலங்காரம் செய்யப்பட்டு மகா தீபாரதனை காண்பிக்கப்பட்டது.

மாலை 5 மணிக்கு மேளதாளங்கள் முழங்க அலங்கரிக்கப்பட்ட திருத்தேரில் ஸ்ரீசக்தி முனீஸ்வரர் எழுந்தருளி வீதி உலா வருதல் நிகழ்ச்சி நடைபெற்றது. திருத்தேர் மேல் கூடலூர் மாரியம்மன், சக்தி விநாயகர் கோவில், செவிடிப்பேட்டை முனீஸ்வரன் கோவிலுக்கு சென்று சிறப்பு பூஜைகள் நடைபெற்றது. பின்னர் முக்கிய சாலைகள் வழியாக சென்று கோவிலை அடைந்தது. தேருக்கு முன்பாக அகல் விளக்குகளை ஏந்தியவாறு ஏராளமான பெண்கள் உட்பட பக்தர்கள் கலந்துகொண்டு சென்றனர். இதற்கான ஏற்பாடுகளை கோவில் கமிட்டியினர் மற்றும் பக்தர்கள் செய்திருந்தனர்.