துப்பாக்கி சுடுதல் போட்டி மதுரையில் தொடங்கியது- மதுரையில் தொடங்கியது

48-வது தமிழ்நாடு துப்பாக்கி சுடுதல் சாம்பியன்ஷிப் போட்டிகள் மதுரையில் நடக்கிறது. இதற்கான தொடக்க விழா நேற்று மாலை மதுரை ரைபிள் கிளப்பில் நடந்தது. தமிழ்நாடு துப்பாக்கி சுடும் சங்க தலைவர் சீதாராம ராவ் தலைமை தாங்கினார். 48-வது டி.என்.எஸ்.சி.சி.யின் அமைப்புச் செயலாளர் பாகலோன் வரவேற்றார். மதுரை ரைபிள் கிளப் செயலாளர் வேல்சங்கர் நன்றி கூறினார். சிறப்பு விருந்தினராக மதுரை காவல்துறை தலைமையக துணை கமிஷனர் மங்களேஸ்வரன் கலந்து கொண்டு 25 மீட்டர் தொலைவில் துப்பாக்கிச் சூடு நடத்தி போட்டிகளை தொடங்கி வைத்தார். நேற்று தொடங்கிய இந்த போட்டிகள் வருகிற 23-ந்தேதி வரை நடக்கிறது. இந்த போட்டியை மதுரை ரைபிள் கிளப் நடத்துகிறது. இதில் தமிழகத்தில் உள்ள 51 கிளப்புகளை சேர்ந்த 1500-க்கும் மேற்பட்ட வீரர்கள் கலந்து கொள்கின்றனர். இவர்களுக்கு, பிஸ்டல், ரைபிள், 10 மீட்டர், 25 மீட்டர், 50 மீட்டர் ஆகிய பிரிவுகளில் போட்டிகள் நடத்தப்படுகிறது. இதில், வயதின் அடிப்படையில் சப் யூத், யூத், ஜூனியர், ஆண்கள், பெண்கள் என தனித்தனியாக போட்டிகள் நடக்கிறது. இந்த போட்டிகளில் வெற்றி பெற்று, தேர்வாகும் வீரர்கள், தேசிய போட்டிகளில் கலந்து கொள்கின்றனர். இவர்களுக்கான பரிசளிப்பு விழா, 16-ந்தேதியும், 23-ந்தேதியும் நடக்கிறது என நிகழ்ச்சி ஏற்பாட்டாளர்கள் கூறினர்.