கஞ்சா கடத்தல்

ஆந்திராவில் இருந்து சேலம் வழியாக மதுரைக்கு சிலர் கஞ்சா கடத்தி செல்வதாக மாவட்ட போதைப்பொருள் தடுப்பு பிரிவு போலீஸ் உயர் அதிகாரிகளுக்கு ரகசிய தகவல் கிடைத்தது. இன்ஸ்பெக்டர் பாபு சுரேஷ்குமார் தலைமையில் சிறப்பு சப்-இன்ஸ்பெக்டர்கள் வேலுமணி, சரவணன் மற்றும் போலீசார் நேற்று முன்தினம் இரவு சேலம் புதிய பஸ்நிலையத்தில் தீவிர சோதனையில் ஈடுபட்டனர்.

அப்போது, மதுரை செல்லும் பஸ்கள் நிற்கும் இடத்தில் சந்தேகப்படும்படி நின்ற 3 பேரை பிடித்து போலீசார் விசாரித்தனர். பின்னர் அவர்கள் வைத்திருந்த பைகளை பரிசோதனை செய்தபோது, அதில் 32 கிலோ கஞ்சா இருந்தது தெரியவந்தது. அவற்றை போலீசார் பறிமுதல் செய்து 3 பேரையும் போலீஸ் நிலையத்திற்கு அழைத்து சென்று விசாரித்தனர்.

3 பேர் கைது

அதில், அவர்கள் மதுரை மாவட்டம் உசிலம்பட்டியை அடுத்த கல்யாணிபட்டியை சேர்ந்த மூர்த்தி (வயது 33), கீரிப்பட்டியை சேர்ந்த லிங்கேஷ் (28), வளையப்பட்டியை சேர்ந்த சந்தானம் (32) என்பது தெரியவந்தது. இவர்கள் 3 பேரும் ஆந்திர மாநிலம் விசாகப்பட்டினம் சென்று 32 கிலோ கஞ்சாவை வாங்கிக்கொண்டு ரெயிலில் வேலூருக்கு கடத்தி வந்துள்ளனர்.

பின்னர் அங்கிருந்து பஸ்சில் ஏறி சேலம் வந்து, மதுரை செல்ல திட்டமிட்டிருந்தது தெரியவந்தது. அவர்கள் 3 பேர் மீதும் கஞ்சா கடத்தல் வழக்குப்பதிவு செய்து கைது செய்தனர். அவர்களை சேலம் கோர்ட்டில் ஆஜர்படுத்தி மத்திய சிறையில் அடைத்தனர்.