மாற்றுத்திறனாளிகள் அடையாள அட்டை வழங்க வட்டார அளவில் சிறப்பு மருத்துவ முகாம்கள்

திருவண்ணாமலை மாவட்டத்தில் மாற்றுத் திறனாளிகள் அடையாள அட்டை வழங்க வட்டார அளவிலான சிறப்பு மருத்துவ முகாம்கள் வருகிற 12-ந் தேதி தொடங்குகிறது என்று கலெக்டர் முருகேஷ் தெரிவித்துள்ளார்.

இதுகுறித்து அவர் வெளியிட்டுள்ள செய்திக்குறிப்பில் கூறியிருப்பதாவது:-

மருத்துவ முகாம்கள்

பள்ளிக்கல்வி துறையின் மாவட்ட திட்ட ஒருங்கிணைப்பாளர் மற்றும் மாவட்ட மாற்றுத்திறனாளிகள் நல அலுவலர் ஆகியோர் ஒருங்கிணைந்து மாற்றுத் திறனாளிகளுக்கு அடையாள அட்டை வழங்க வருகிற 12-ந் தேதி (செவ்வாய்க்கிழமை) முதல் வட்டார அளவிலான மருத்துவ முகாம்கள் நடைபெற உள்ளது.

அதன்படி 12-ந் தேதி செய்யாறு அரசு ஆண்கள் மேல்நிலைப்பள்ளிலும், 13-ந் தேதி திருவண்ணாமலை டவுன்ஹால் நடுநிலைப்பள்ளிலும், 14-ந் தேதி வந்தவாசி அரசு ஆண்கள் மேல்நிலைப்பள்ளிலும், 19-ந் தேதி செங்கம் அரசு ஆண்கள் மேல்நிலைப்பள்ளியிலும், 20-ந் தேதி மேற்கு ஆரணி வட்டார வளமையத்திலும், 21-ந் தேதி தண்டராம்பட்டு ஊராட்சி ஒன்றிய தொடக்கப்பள்ளிலும் நடைபெற உள்ளது.

மேலும் 26-ந் தேதி போளுர் அரசு பெண்கள் மேல்நிலைப்பள்ளி, 27-ந் தேதி ஆரணி அரசு ஆண்கள் மேல்நிலைப்பள்ளிலும், க்டோபர் மாதம் 3-ந் தேதி ஜவ்வாதுமலையிலும், 4-ந் தேதி சேத்துப்பட்டு பழம்பேட்டை அரசு மேல்நிலைப்பள்ளியிலும், 5-ந் தேதி கீழ்பென்னாத்தூர் அரசு ஆண்கள் மேல்நிலைப்பள்ளிலும், 10-ந் தேதி பெரணமல்லூர் அரசு ஆண்கள் மேல்நிலைப்பள்ளிலும் நடைபெற உள்ளது.

11-ந் தேதி கலசபாக்கம் அரசு ஆண்கள் மேல்நிலைப்பள்ளி, 12-ந் தேதி வெம்பாக்கம் அரசு ஆண்கள் மேல்நிலைப்பள்ளியிலும், 17-ந் தேதி புதுப்பாளையம் வட்டார வள மையம் அரசு பெண்கள் மேல்நிலைப் பள்ளிலும், 18-ந் தேதி அனகாவூர் அரசு மேல்நிலைப் பள்ளியிலும், 19-ந் தேதி துரிஞ்சாபுரம் ஊராட்சி ஒன்றிய நடுநிலைப்பள்ளியிலும், 20-ந் தேதி தெள்ளாறு அரசு ஆண்கள் மேல்நிலைப்பள்ளியிலும் நடக்கிறது.

தற்காலிக நிறுத்தம்

இந்த சிறப்பு முகாம்களில் மாற்றுத்திறனாளிகள் கலந்துக்கொண்டு மாற்றுத்திறனாளிகளுக்கான தேசிய அடையாள அட்டை, மத்திய அரசின் தனித்துவம் வாய்ந்த யு.டி.ஐ.டி. அடையாள அட்டை ஆன்லைன் பதிவு, முதல்- அமைச்சரின் விரிவான மருத்துவ காப்பீட்டு திட்டம், ஆதார் அட்டை போன்றவை வழங்கப்படும்.

முகாமில் பங்கேற்கும் மாற்றுத்திறனாளிகள் உரிய அசல் மற்றும் நகல் ஆவணங்கள், ஆதார் அட்டை, குடும்ப அட்டை, புகைப்படம் 4 ஆகியவற்றை கொண்டு வர வேண்டும்.

மேலும் பிரதிவாரம் வியாழக்கிழமைகளில் மாவட்ட மாற்றுத்திறனாளிகள் நல அலுவலக வளாகத்தில் நடைபெறும் முகாம் தற்காலிகமாக நிறுத்தப்படுகிறது.

மீண்டும் மாவட்ட மாற்றுத்திறனாளிகள் நல அலுவலகத்தில் வாரந்தோறும் நடைபெறும் முகாம் குறித்து பின்னர் அறிவிக்கப்படும்.

இவ்வாறு அதில் கூறப்பட்டுள்ளது.