விளையாட்டு விடுதிகளில்மாணவர்கள் சேர்க்கைக்கான தேர்வு போட்டிகள்தர்மபுரியில் 24-ந் தேதி நடக்கிறது

விளையாட்டு விடுதிகளில் மாணவர்கள் சேர்க்கைக்கான தேர்வு போட்டிகள் தர்மபுரி மாவட்ட விளையாட்டு அரங்கில் 24-ந்தேதி நடக்கிறது.

இது தொடர்பாக தர்மபுரி மாவட்ட கலெக்டர் சாந்தி வெளியிட்டுள்ள செய்திக்குறிப்பில் கூறியிருப்பதாவது:-

விளையாட்டு விடுதிகள்

தமிழ்நாடு விளையாட்டு மேம்பாட்டு ஆணையத்தின் மூலம் பள்ளிகளில் படிக்கும் மாணவ, மாணவிகள் விளையாட்டுகளில் சாதனை புரிவதற்கு ஏற்ப பயிற்சி அளிப்பதற்கு ஏதுவாக தங்குமிட வசதி மற்றும் சத்தான உணவுடன் கூடிய விளையாட்டு விடுதிகள் மற்றும் முதன்மை நிலை விளையாட்டு மையங்களை பல்வேறு மாவட்டங்களில் செயல்படுத்தி வருகின்றன. இதன்படி மாணவர்களுக்கான விளையாட்டு விடுதிகள் மதுரை, திருச்சி, நெல்லை, கிருஷ்ணகிரி, கோவை, கடலூர், தஞ்சாவூர், அரியலூர், தூத்துக்குடி, சிவகங்கை, தேனி, ராமநாதபுரம், ஊட்டி, விழுப்புரம், சென்னை, நெய்வேலி மற்றும் நாமக்கல் ஆகிய இடங்களில் செயல்பட்டு வருகிறது.

மாணவிகளுக்கான விளையாட்டு விடுதிகள் ஈரோடு, திருவண்ணாமலை, நாமக்கல், திண்டுக்கல், நாகர்கோவில், பெரம்பலூர், தேனி, புதுக்கோட்டை, தர்மபுரி மற்றும் சென்னை ஆகிய இடங்களில் செயல்பட்டு வருகின்றன. மாணவர்களுக்கான முதன்மை நிலை விளையாட்டு மைய விடுதி சென்னை ஜவஹர்லால் நேரு விளையாட்டரங்கம், திருச்சி ஸ்ரீரங்கம் மற்றும் நெல்லையிலும், மாணவிகளுக்கான முதன்மை நிலை விளையாட்டு மைய விடுதி சென்னை ஜவஹர்லால் நேரு உள் விளையாட்டரங்கம் மற்றும் ஈரோட்டிலும் செயல்படுகின்றன.

தேர்வு போட்டிகள்

மேற்கண்ட விடுதிகளில் பயிற்சி அளிக்கப்படும் விளையாட்டுகளில் பயிற்சி பெற்று சிறந்த விளையாட்டு வீரர், வீராங்கனைகளாக விளங்குவதற்கு 7-ம் வகுப்பு, 8-ம் வகுப்பு, 9-ம் வகுப்பு மற்றும் பிளஸ்-1 மாணவர் சேர்க்கை நடைபெற உள்ளது.

இதேபோல் முதன்மை நிலை விளையாட்டு மையங்களில் பயிற்சி பெற்று சிறந்த விளையாட்டு வீரர், வீராங்கனைகளாக விளங்குவதற்கு 6-ம் வகுப்பு, 7-ம் வகுப்பு மற்றும் 8-ம் வகுப்பு ஆகிய வகுப்புகளில் சேர்க்கை நடைபெறும். இதற்கு மாவட்ட அளவிலான தேர்வு போட்டிகள் வருகிற 24-ந்தேதி தர்மபுரி மாவட்ட விளையாட்டு அரங்கில் நடைபெற உள்ளது.

ஆன்லைனில் விண்ணப்பிக்கலாம்

மாணவ, மாணவிகளுக்கு தடகளம், இறகுப்பந்து, கூடைப்பந்து, குத்துச்சண்டை, கால்பந்து, ஜிம்னாஸ்டிக், கைப்பந்து, கையுந்து பந்து, வளைகோல் பந்து, நீச்சல், தேக்வாண்டோ, கபடி டென்னிஸ், ஜூடோ, ஸ்குவாஷ், வில்வித்தை, பளுதூக்குதல், மேசைப்பந்து, வாள்சண்டை ஆகிய விளையாட்டுகளிலும், மாணவர்களுக்கு மட்டும் கூடுதலாக கிரிக்கெட்டிலும் நடைபெறும்.

மாவட்ட, மாநில மற்றும் தேசிய அளவிலான விளையாட்டு போட்டிகளில் வெற்றி பெற்ற மாணவ, மாணவிகளுக்கு முன்னுரிமை வழங்கப்படும். விளையாட்டு விடுதி மற்றும் முதன்மை விளையாட்டு மையங்களில் சேர மாணவ, மாணவிகள் www.sdat.tn.gov.in என்ற இணையதள முகவரியில் ஆன்லைன் மூலம் விண்ணப்பிக்கலாம். விண்ணப்பிக்க 23-ந் தேதி கடைசி நாள் ஆகும்.

இவ்வாறு அதில் கூறப்பட்டுள்ளது.