பள்ளி- கல்லூரிகளை தூய்மையாக வைத்துக்கொள்ளும் எண்ணத்தை மாணவர்கள் மனதில் உருவாக்க வேண்டும் ஆசிரியர்களுக்கு கலெக்டர் மோகன் அறிவுரை

விழுப்புரம் மாவட்டத்தில் 'நம் பள்ளி- நம் பெருமை" நகரங்களின் தூய்மைக்கான மக்கள் இயக்கத்தின்கீழ் பள்ளி- கல்லூரிகளில் தூய்மைப்பணிகள் மேற்கொள்வது குறித்த விழிப்புணர்வு ஆலோசனைகூட்டம் கலெக்டர் அலுவலகத்தில் நடைபெற்றது. கூட்டத்திற்கு மாவட்ட கலெக்டர் மோகன் தலைமை தாங்கினார். அப்போது அவர் கூறியதாவது:-

பள்ளி- கல்லூரிகளில் தூய்மைப்பணி குறித்த விழிப்புணர்வினை மாணவ- மாணவிகளிடையே தலைமையாசிரியர்கள் மற்றும் கல்லூரி முதல்வர்கள் ஆகியோர் ஏற்படுத்த வேண்டும். தூய்மை குறித்த விழிப்புணர்வு மற்றும் தூய்மை பற்றிய போட்டிகளில் அந்தந்த வயதுக்கேற்ப மாணவர்களை பங்குபெறச்செய்து அதன் மூலம் விழிப்புணர்வு ஏற்படுத்த வேண்டும். ஒவ்வொரு நாளும் காலை வகுப்புகள் தொடங்கும் முன்பே வழிபாட்டு கூட்டரங்கில் தூய்மை குறித்த உறுதிமொழியினை மாணவர்களை எடுக்கச் சொல்ல வேண்டும்.

மாணவர்களுக்கு விழிப்புணர்வு

பள்ளி மற்றும் தங்கள் வீடுகளை எவ்வாறு தூய்மையாக வைத்துக்கொள்வது என்ற செயல்விளக்கத்தினை மாணவர்களிடையே செய்து காண்பித்து அதன் அடிப்படையில் ஒவ்வொரு நாளும் சுகாதாரமான முறையில் பள்ளி மற்றும் தங்கள் வீடுகளை தூய்மையாக வைத்துக்கொள்ள அறிவுறுத்த வேண்டும். வகுப்பறைகளில் மாணவர்களுக்கு மக்கும் குப்பை, மக்காத குப்பைகள் குறித்து தெளிவாக எடுத்துரைக்க வேண்டும். அதுபோல் பள்ளிகள், கல்லூரிகள், பொதுஇடங்களில் உள்ள கழிவறைகளை பயன்படுத்திய பின் எவ்வாறு தூய்மையாக வைத்துக்கொள்வது குறித்தும் விழிப்புணர்வு ஏற்படுத்த வேண்டும். இன்றைய மாணவர்கள்தான் நாளைய வருங்கால சமுதாயத்தினர், எனவே மாணவர்கள் ஒவ்வொருவரும் தங்கள் பள்ளிகளை தூய்மையாக வைத்துக்கொள்ள ஆசிரியர்கள் சரியான வழிகாட்டுதல்கள் மற்றும் அறிவுரைகளை வழங்க வேண்டும்.

இவ்வாறு அவர் கூறினார்.

கூட்டத்தில் மாவட்ட முதன்மை கல்வி அலுவலர் கிருஷ்ணப்பிரியா, கலெக்டரின் நேர்முக உதவியாளர் (வளர்ச்சி) சரவணன், நகராட்சி ஆணையர் சுரேந்திரஷா மற்றும் பள்ளி தலைமையாசிரியர்கள், ஆசிரியர்கள், அரசு அலுவலர்கள் கலந்துகொண்டனர்.