ராமேசுவரம்,

ராமேசுவரம், மெய்யம்புளி பகுதியில் செயல்பட்டு வரும் கிரைஸ்ட் தி கிங் இன்டர்நேஷனல் சி.பி.எஸ்.இ. பள்ளியில் மதுரை சகோதயா ஸ்கூல்ஸ் காம்ப்ளக்ஸ் சோன்பைவ் ஸ்கேட்டிங் விளையாட்டு போட்டி நடைபெற்றது. இதில் ராமநாதபுரம், சிவகங்கை, புதுக்கோட்டை ஆகிய 3 மாவட்டங்களில் இருந்து 10 பள்ளிகளை சேர்ந்த 100 மாணவர்கள் பங்கேற்றனர். இதில் 300 மீட்டர், 500 மீட்டர், 1000 மீட்டர் என 3 பிரிவாக நடந்த ஸ்கேட்டிங் விளையாட்டு போட்டியில் ராமேசுவரம் கிரைஸ்ட் தி கிங் இன்டர்நேஷனல் சி.பி.எஸ்.இ. பள்ளியின் மாணவ-மாணவிகள் 11 தங்கப்பதக்கமும், 7 வெள்ளிப் பதக்கமும், 4 வெண்கல பதக்கமும் மொத்தம் 22 பதக்கங்களை வென்று சாதனை படைத்தனர்.

இதே போல் ராமநாதபுரத்தில் நடந்த 12 வயதுக்குட்பட்ட கூடைப்பந்து விளையாட்டு போட்டியிலும், கால்பந்து விளையாட்டு போட்டியிலும் ராமேசுவரம் கிரைஸ்ட் தி கிங் இன்டர்நேஷனல் சி.பி.எஸ்.இ பள்ளி 2-வது இடம் பிடித்து வெள்ளி பதக்கம் பெற்றது. ஸ்கேட்டிங் மற்றும் கூடைப்பந்து, கால்பந்து விளையாட்டு போட்டிகளில் வெற்றி பெற்று சாதனை படைத்த மாணவ-மாணவிகளை பள்ளியின் தாளாளர் பில்லிகிரஹாம், முதல்வர் ஷாலினிபில்லிகிரஹாம் மற்றும் அனைத்து ஆசிரியர்களும் பாராட்டி வாழ்த்து தெரிவித்தனர்.