கூடங்குளம் 2-வது அணுஉலையில் மின்உற்பத்தி திடீர் நிறுத்தம்

வள்ளியூர்:

நெல்லை மாவட்டம் கூடங்குளத்தில் தலா 1,000 மெகாவாட் மின் உற்பத்தி திறன் கொண்ட 2 அணு உலைகள் அமைக்கப்பட்டு மின் உற்பத்தி நடந்து வருகிறது. மேலும் 4 அணு உலைகள் கட்டுமான பணிகள் முழுவீச்சில் நடந்து வருகிறது.

இந்த நிலையில் 2-வது அணு உலையில் டர்பைனில் நேற்று திடீரென பழுது ஏற்பட்டது. இதன் காரணமாக மாலை 4.45 மணியளவில் அந்த அணு உலையில் மின்உற்பத்தி நிறுத்தப்பட்டது.

இதனால் 1,000 மெகாவாட் மின் உற்பத்தி பாதிக்கப்பட்டு உள்ளது. இன்னும் ஓரிரு நாட்களில் டர்பைனில் ஏற்பட்ட பழுது சரி செய்யப்பட்டு மீண்டும் மின்உற்பத்தி தொடங்கப்படும் என்று அணுமின் நிலைய வட்டாரம் தெரிவித்தது.

தற்போது முதலாவது அணு உலையில் 1,000 மெகாவாட் மின் உற்பத்தி நடைபெற்று வருகிறது என்பது குறிப்பிடத்தக்கது.