பரமத்திவேலூர் அருகே விவசாயி விஷம் குடித்து தற்கொலை

பரமத்திவேலூர்:

பரமத்திவேலூர் அருகே உள்ள நல்லியாம்பாளையம் கானாங்காடு பகுதியை சேர்ந்தவர் கருப்பண்ணன் (வயது 75) விவசாயி. இவர் கடந்த சில மாதங்களாக உடல்நிலை பாதிக்கப்பட்டு சிகிச்சை பெற்று வந்ததாக கூறப்படுகிறது. இதனால் மனமுடைந்த நிலையில் இருந்த கருப்பண்ணன் நேற்று விஷம் குடித்து உயிருக்கு போராடினார். இதை பார்த்த அக்கம்பக்கத்தினர் அவரை மீட்டு நாமக்கல்லில் உள்ள ஒரு தனியார் மருத்துவமனையில் சேர்த்தனர். பின்னர் வேலூர் அரசு மருத்துவமனையில் அனுமதித்தனர். அங்கு அவரை பரிசோதனை செய்த டாக்டர்கள் வரும் வழியிலேயே கருப்பண்ணன் இறந்து விட்டதாக தெரிவித்தனர். இதையடுத்து அவருடைய உடல் பிரேத பரிசோதனை கூடத்துக்கு அனுப்பி வைக்கப்பட்டது. இதுகுறித்து கருப்பண்ணனின் மகள் நிர்மலா கொடுத்த புகாரின்பேரில் பரமத்திவேலூர் போலீசார் வழக்குப்பதிவு செய்து விசாரணை நடத்தி வருகின்றனர்.