அரசு பஸ் மோதி வாலிபர் சாவு

கள்ளக்குறிச்சி

கள்ளக்குறிச்சி இந்திரா நகரை சேர்ந்தவர் நல்லுசாமி மகன் மணிகண்டன்(வயது 33). இவர் நேற்று முன்தினம் மோரைப்பாதையை சேர்ந்த கண்ணன் மகன் மணிகண்டன்(28) என்பவரை தனது மோட்டார் சைக்கிளில் பின்னால் உட்கார வைத்துக்கொண்டு கள்ளக்குறிச்சி எம்.ஆர்.என்.நகர் ஆர்ச் வளைவு முன்பு துருகம் சாலையில் கிழக்கு புறத்திலிருந்து மேற்கு நோக்கி வந்து கொண்டிருந்தார். அப்போது தியாகதுருகத்தில் இருந்து கள்ளக்குறிச்சி நோக்கி வந்த அரசு பஸ் இவர்கள் வந்த மோட்டார் சைக்கிள் மீது மோதியது. இதில் படுகாயம் அடைந்த கண்ணன் மகன் மணிகண்டன் சம்பவ இடத்திலே பரிதாபமாக இறந்தார். படுகாயம் அடைந்த நல்லுசாமி மகன் மணிகண்டனை அக்கம்பக்கத்தினர் சிகிச்சைக்காக கள்ளக்குறிச்சி அரசு ஆஸ்பத்திரியில் சேர்த்தனர். அங்கு அவருக்கு டாக்டர்கள் தீவிர சிகிச்சை அளித்து வருகிறார்கள். இந்த விபத்து குறித்து கள்ளக்குறிச்சி போலீசார் வழக்குப்பதிவு செய்து விசாரணை நடத்தி வருகின்றனர்.