கார் மோதி வாலிபர் பலி

நாங்குநேரி:

தூத்துக்குடி மாவட்டம் சாத்தான்குளம் பெருமாள்குளம் காலனியை சேர்ந்தவர் முருகன் மகன் மதன்ராஜ் (வயது 23). கூலித்தொழிலாளி. இவரது நண்பர் பேய்குளத்தை சேர்ந்த ஜெயக்குமார் மகன் செல்வேந்திரன் (22). இவர்கள் 2 பேரும் நாங்குநேரி அருகே உள்ள பாணாங்குளத்தில் அவர்களது உறவினரின் துக்க நிகழ்ச்சியில் கலந்து கொள்வதற்காக வந்தனர். பின்னர் அவர்கள் ஊருக்கு மோட்டார் சைக்கிளில் திரும்பினார்கள். நெல்லை அருகே மூன்றடைப்பு பகுதியில் வந்த போது பின்னால் வந்த கார், மோட்டார் சைக்கிள் மீது மோதியது. இந்த விபத்தில் மதன்ராஜ், செல்வேந்திரன் தூக்கி வீசப்பட்டு பலத்த காயம் அடைந்தனர். அக்கம்பக்கத்தினர் 2 பேரையும் மீட்டு சிகிச்சைக்காக நெல்லை அரசு மருத்துவமனையில் அனுமதித்தனர். அங்கு மதன்ராஜ் பரிதாபமாக உயிரிழந்தார். இதுபற்றி மூன்றடைப்பு போலீசார் வழக்குப்பதிவு செய்து விசாரணை நடத்தி வருகிறார்கள்.