'வன்முறையை தவிர்க்க கோவில்களையே மூடிவிடலாம்' ஐகோர்ட்டு அதிரடி உத்தரவு

சென்னை,

மயிலாடுதுறை மாவட்டத்தைச் சேர்ந்த தங்கராசு என்ற 92 வயது முதியவர், தன் மகன் மூலம் சென்னை ஐகோர்ட்டில் ஒரு மனு தாக்கல் செய்தார். அதில், "சீர்காழி நகரில் உள்ள ருத்ரா மகாகாளியம்மன் கோவிலில் ஆடி மாதத்தை முன்னிட்டு தீ மிதி உற்சவத் திருவிழா நாளை (ஞாயிற்றுக்கிழமை) முதல் ஆகஸ்டு 1-ந்தேதி வரை நடைபெற உள்ளது.

இந்த நிகழ்ச்சி அமைதியாக நடைபெறும் விதமாக போலீஸ் பாதுகாப்பு கேட்டு கடந்த ஜூன் 21-ந்தேதியே மாவட்ட போலீஸ் சூப்பிரண்டுக்கு கோரிக்கை மனு கொடுத்தும் இதுவரை பரிசீலிக்கவில்லை. எனவே, பாதுகாப்பு கொடுக்க உத்தரவிட வேண்டும்" என்று கூறியிருந்தார்.

தீர்வு இல்லை

இந்த வழக்கு நீதிபதி என்.ஆனந்த் வெங்கடேஷ் முன்பு விசாரணைக்கு வந்தது. அப்போது, போலீஸ் தரப்பில் ஆஜரான கூடுதல் குற்றவியல் வக்கீல் ஏ.தாமோதரன், "இந்த கோவில் திருவிழா நடத்துவதில் 2 குழுக்களுக்கு இடையே பிரச்சினை உள்ளது. இதுகுறித்து தாசில்தார் சமாதான கூட்டம் நடத்தியும் பிரச்சினைக்கு தீர்வு ஏற்படவில்லை" என்றார்.

இதையடுத்து நீதிபதி பிறப்பித்த அதிரடி உத்தரவில் கூறியிருப்பதாவது:-

இதுபோன்ற வழக்குகளை தினமும் இந்த ஐகோர்ட்டு விசாரிக்கிறது. கோவில் பண்டிகையை யார் நடத்துவது? என்று ஒவ்வொரு கோவிலிலும் இரு குழுக்கள் சட்டம்-ஒழுங்கு பிரச்சினைகளை ஏற்படுத்துகின்றன. வாழ்க்கையில் அமைதி, சந்தோசம் ஆகியவற்றுக்காக இறைவனை வழிபடத்தான் கோவில் உள்ளது.

கோவிலை மூடலாம்

ஆனால், துரதிருஷ்டவசமாக கோவில் திருவிழா என்பது யார் ஏரியாவில் பெரிய ஆள்? என்பதை நிரூபிக்கும் வன்முறை களமாக உள்ளன. இதுபோன்ற கோவில் திருவிழா வில் பக்தி என்பதற்கு இடமே இல்லை. கோவில் என்பது இதுபோல வன்முறை களமாக இருந்தால், கோவில்கள் இருப்பதே அர்த்தமற்றதாகி விடுகிறது. இதுபோன்ற வன்முறையை தவிர்க்க கோவில் களையே மூடிவிடலாம்.

அகங்காரம் இல்லாமல், இறைவனின் ஆசிர்வாதத்தை பெற கோவில் செல்லாவிட்டால், கோவில் இருப்பதற்கான நோக்கமே பயனற்றதாகி விடும். இதுபோன்ற வழக்குகளை இந்த ஐகோர்ட்டு தினமும் விசாரிப்பதே வேதனையாக உள்ளது.

பாதுகாப்பு தேவை இல்லை

பக்தியே இல்லாத இதுபோன்ற கோவில் திருவிழா பிரச்சினையை தீர்ப்பதற்கு போலீசாரும், வருவாய் அதிகாரிகளும் எடுக்கும் அனைத்து நடவடிக்கைகளும் வீண்தான். அவர்கள் தங்கள் நேரத்தையும், சக்தியையும் வீணடிக்கின்றனர். போலீஸ் மற்றும் வருவாய் அதிகாரிகளுக்கு இதைவிட முக்கியமான பணிகள் பல உள்ளன.

எனவே, இதுபோன்ற கோவில் திருவிழாவுக்கு பாதுகாப்பு வழங்க தேவை இல்லை. கோவில் திருவிழாவை, அகங்காரத்தை முன்னிருத்தாமல், அமைதியான முறையில் நடத்தும் பொறுப்பை அந்த குழுக்களுக்கே விட்டு விடுகிறேன்.

உடனே நடவடிக்கை

ஏதாவது சட்டம்-ஒழுங்கு பிரச்சினை ஏற்பட்டால், அதற்கு காரணமான நபர்கள் மீது சம்பந்தப்பட்ட போலீசார் சட்டப்படி நடவடிக்கையை உடனே எடுக்க வேண்டும். கோவில் திருவிழாவையும் மேற்கொண்டு நடத்த விடாமல் தடுத்து நிறுத்தி விடவேண்டும். இந்த வழக்கை முடித்து வைக்கிறேன்.

இவ்வாறு நீதிபதி கூறியுள்ளார்.