சென்னை,

தமிழகத்திற்கும், உத்தரபிரதேச மாநிலம் காசிக்கும் இடையே உள்ள ஆன்மிக உறவை வலுப்படுத்தும் வகையில், 'காசி தமிழ் சங்கமம்' எனும் ஆன்மிக நிகழ்வை மத்திய கல்வித்துறை அமைச்சகம் நடத்தி வருகிறது. தற்போது, 'காசி தமிழ் சங்கமம் 2.0' நிகழ்வு வாரணாசியில் வருகிற 30-ந்தேதி வரை நடைபெறுகிறது. இதில், பங்கேற்க தமிழகத்தில் இருந்து 7 குழுக்கள் வாரணாசி செல்கின்றன.

முதல் குழு சென்னை சென்டிரல் ரெயில் நிலையத்தில் இருந்து கடந்த 15-ந்தேதி புறப்பட்டு சென்றது. 2-வது குழு கன்னியாகுமரியில் இருந்து கடந்த 16-ந்தேதியும், 3-வது குழு கோவையில் இருந்து கடந்த 19-ந்தேதியும் புறப்பட்டு சென்றது. இந்த நிலையில், 'காசி தமிழ் சங்கமம் 2.0' ஆன்மிக பயணங்களுக்கான 4-வது குழு, கன்னியாகுமரி மாவட்டத்தில் இருந்து நேற்று முன்தினம் புறப்பட்டது.

இந்த நிலையில், 4-வது குழுவில் இடம்பெற்றுள்ள சென்னையை சேர்ந்தவர்கள், கன்னியாகுமரி-வாரணாசி சிறப்பு ரெயில் பயணம் மேற்கொள்ள பெரம்பூர் ரெயில் நிலையத்திற்கு நேற்று வருகை தந்தனர். அவர்களை, தமிழக பா.ஜனதா ஆன்மிக பிரிவு மாநில தலைவர் நாச்சியப்பன், காசிக்கு வழியனுப்பி வைத்தார்.

4-வது குழுவில், 85 பெண்கள் உள்பட 216 பேர் பயணம் மேற்கொண்டுள்ளனர். இந்த குழுவினர், நாளை அதிகாலை 4.30 மணிக்கு வாரணாசி செல்கின்றனர். அதன்பிறகு, காசி ஆன்மிக நிகழ்வில் பங்கேற்கின்றனர்.