20 அடி பள்ளத்தில் கவிழ்ந்த கார்

மதுரை அய்யர் பங்களா பகுதியை சேர்ந்தவர் கார்த்திக்ராஜா (வயது 23). இவர், அதே பகுதியை சேர்ந்த தனது நண்பர்கள் 2 பேருடன் நேற்று தேனி மாவட்டம் போடி அருகே தமிழக-கேரள எல்லையில் உள்ள கொழுக்குமலை பகுதிக்கு காரில் சுற்றுலா சென்றார். அங்கு சுற்றுலா இடங்களை பார்த்துவிட்டு, 3 பேரும் திரும்பி மதுரை நோக்கி புறப்பட்டனர். காரை கார்த்திக்ராஜா ஓட்டினார். போடி அருகே போடிமெட்டு மலைப்பாதையில் 13-வது கொண்டை ஊசி வளைவு பகுதியில் அவர்கள் வந்தபோது, திடீரென்று டிரைவரின் கட்டுப்பாட்டை இழந்து கார் தாறுமாறாக ஓடியது. ஒருகட்டத்தில் அந்த கார் சாலையோரம் இருந்த 20 அடி பள்ளத்தில் கவிழ்ந்தது. இந்த விபத்தில் அதிர்ஷ்டவசமாக கார்த்திக்ராஜா மற்றும் அவரது 2 நண்பர்களும் காயமின்றி உயிர்தப்பினர். இதுகுறித்து போடி குரங்கணி போலீசார் விசாரணை நடத்தி வருகின்றனர்.