மின் கசிவால் குடிசை தீப்பிடித்தது

பரமத்திவேலூர்

பரமத்திவேலூர் தாலுகா, திடுமல் அருகே உள்ள நகப்பாளையம் பகுதியை சேர்ந்தவர் விஸ்வநாதன் (வயது45). இவர் கீற்றுக் கொட்டகையின் மேல் தகரம் வேய்ந்த வீட்டில் குடும்பத்துடன் வசித்து வந்தார். இந்தநிலையில் மின் கசிவு காரணமாக கீற்றுக் கொட்டகையில் திடீரென தீப்பிடித்து எரிய ஆரம்பித்துள்ளது. அதை பார்த்த விஸ்வநாதன் அக்கம்பக்கத்தினர் உதவியுடன் தீயை அணைக்க முயற்சி செய்தனர். ஆனால் தீயை அணைக்க முடியாததால் விஸ்வநாதன் வேலாயுதம்பாளையம் தீயணைப்பு நிலையத்துக்கு தகவல் தெரிவித்துள்ளார். இதன்பேரில் அங்கு வந்த தீயணைப்பு நிலைய வீரர்கள் கீற்றுக் கொட்டகையில் எரிந்து கொண்டிருந்த தீயை தண்ணீரை பீய்ச்சி அடித்து தீ மேலும் பரவாமல் தடுத்தனர். இதனால் தீ விபத்து தவிர்க்கப்பட்டது. இருப்பினும் கூரை வீடு முழுவதும் எரிந்து சேதமானது. இதில் கூரை வீட்டில் நிறுத்தி வைக்கப்பட்டிருந்த மோட்டார் சைக்கிள், பேன், டி.வி., பிரிட்ஜ், பீரோ, உணவுப் பொருட்கள், துணிமணிகள் உள்ளிட்ட அனைத்தும் தீயில் எரிந்து சாம்பலாயின. இதன் மதிப்பு ரூ.1 லட்சத்திற்கும் மேல் இருக்கும் என வீட்டின் உரிமையாளர் தெரிவித்தார்.