விபத்தில் விவசாயி பலி

திருவாரூர் மாவட்டம் கோட்டூரை அடுத்த சந்தானநல்லூரை சேர்ந்த ராதாகிருஷ்ணன் மகன் கவுதமன் (வயது30). விவசாயி. இவருக்கு திருமணமாகி ஒரு ஆண்டு ஆகிறது. இவரது மனைவி திவ்யா கர்ப்பிணியாக உள்ளார். இந்த நிலையில் கவுதமன் நேற்று முன்தினம் தஞ்சை சென்று விட்டு இரவு ஸ்கூட்டரில் தஞ்சை-மன்னார்குடி சாலையில் வீட்டிற்கு திரும்பி கொண்டு இருந்தார். இவர் நெய்வாசல் பெட்ரோல் பங்க் அருகே சென்று கொண்டிருந்தபோது எதிர்பாராதவிமாக ஸ்கூட்டரில் இருந்து கவுதமன் தவறி கீழே விழுந்தார். இதில் தலையில் படுகாயம் அடைந்த அவர் சம்பவ இடத்திலேயே பரிதாபமாக இறந்தார். இதுகுறித்து தகவல் அறிந்த ஒரத்தநாடு போலீசார் அவருடைய உடலை கைப்பற்றி ஒரத்தநாடு அரசு ஆஸ்பத்திரிக்கு பிரேத பரிசோதனைக்கு அனுப்பி வைத்தனர். மேலும் இது குறித்து போலீசார் வழக்குப்பதிவு செய்து விசாரணை நடத்தி வருகின்றனர்.