வாகனம் மோதி கொத்தனார் உடல் நசுங்கி பலி

கடலூர் மாவட்டம், தொழுதூர் வடக்கு தெருவை சேர்ந்தவர் நாகராஜ் (வயது 50). கொத்தனாரான இவர் நேற்று அதிகாலை சென்னை-திருச்சி தேசிய நெடுஞ்சாலையில் பெரம்பலூர் மாவட்டம், வேப்பந்தட்டை தாலுகா, திருமாந்துறை சுங்கச்சாவடி அருகே சாலையில் நடந்து சென்று கொண்டிருந்தார். அப்போது அந்த வழியாக வந்த அடையாளம் தெரியாத வாகனம் நாகராஜ் மீது மோதி விட்டு நிற்காமல் சென்றது. இதில் நாகராஜ் சம்பவ இடத்திலேயே உடல் நசுங்கி பரிதாபமாக உயிரிழந்தார். இதுகுறித்து தகவலறிந்த மங்களமேடு போலீசார் சம்பவ இடத்துக்கு சென்று நாகராஜூன் உடலை கைப்பற்றி பிரேத பரிசோதனைக்காக பெரம்பலூர் அரசு மருத்துவமனைக்கு அனுப்பி வைத்தனர். இது தொடர்பாக மங்களமேடு போலீசார் வழக்குப்பதிவு செய்து விபத்தை ஏற்படுத்தி சென்ற வாகனம் குறித்து விசாரணை நடத்தி வருகின்றனர்.