சிறுமியை திருமணம் செய்து கர்ப்பமாக்கிய கொத்தனார் கைது

கொத்தனார் கைது

பெரம்பலூர் மாவட்டம், வேப்பந்தட்டை தாலுகா, பசும்பலூர் கிராமத்தை சேர்ந்தவர் சின்னசாமி (வயது 37). கொத்தனாரான இவர் 14 வயதுடைய சிறுமியை திருமணம் செய்தார். மேலும் அந்த சிறுமி தற்போது 4 மாத கர்ப்பமாக உள்ளார். இந்த திருமணத்திற்கு சின்னசாமியின் தாயும், சிறுமியின் தாயும் உடந்தையாக இருந்துள்ளனர்.

இது தொடர்பாக பெரம்பலூர் அனைத்து மகளிர் போலீசார் குழந்தை திருமணம், போக்சோ உள்ளிட்ட சட்டங்களின் கீழ் சின்னசாமி, அவரது தாய் மற்றும் சிறுமியின் தாய் ஆகிய 3 பேர் மீது வழக்குப்பதிவு செய்தனர். இதில் சின்னசாமியை நேற்று கைது செய்த மகளிர் போலீசார் கோர்ட்டில் ஆஜர்படுத்தி பெரம்பலூர் கிளை சிறையில் அடைத்தனர்.

நடவடிக்கை எடுக்கப்படும்

மேலும் மாவட்டத்தில் குழந்தை திருமணம் பற்றி அறிந்தால் சைல்டு லைனை 1098 என்ற கட்டணமில்லா தொலைபேசி எண்ணை தொடர்பு கொண்டு தகவல் தெரிவித்தால் சட்டப்படி நடவடிக்கை எடுக்கப்படும். தகவல் தெரிவிப்பவரின் விவரம் ரகசியம் காக்கப்படும். இதேபோல் பெண்களுக்கு எதிரான வன்கொடுமைகள் நடந்தால் 181 என்ற எண்ணை தொடர்பு கொண்டு தெரிவிக்கலாம் என்று போலீசார் தெரிவித்தனர்.