தொழிலாளி வீட்டில் பணம் திருட்டு

கூடலூர் அருகே உள்ள ஆங்கூர்பாளையம் சர்ச் தெருவை சேர்ந்தவர் ஜீவகன் (வயது 39). கூலித்தொழிலாளி. நேற்று முன்தினம் இவர், வேலைக்கு சென்று விட்டார். இவரது மனைவி மாடுகளுக்கு புல் அறுக்க தோட்டத்திற்கு சென்று விட்டார். இந்த நிலையில் ஜீவகனின் அக்காள் மகன் வைரவன் வீட்டிற்கு வந்தார். அப்போது வீட்டின் கதவில் இருந்த பூட்டு உடைக்கப்பட்டு திறந்து கிடந்தது.

இதைக்கண்டு அதிர்ச்சி அடைந்த அவர் ஜீவகனின் மனைவிக்கு தகவல் கொடுத்தார். அதன்பேரில் அவர் வீட்டிற்கு வந்து உள்ளே சென்று பார்த்தார். அப்போது பீரோவில் இருந்த ரூ.9 ஆயிரத்து 950 மற்றும் வீட்டு பத்திர நகல் திருடுபோய் இருந்தது. இதுகுறித்து அவர் கூடலூர் வடக்கு போலீஸ் நிலையத்தில் புகார் கொடுத்தார். அதன்பேரில் போலீஸ் சப்-இன்ஸ்பெக்டர் பாலசுப்ரமணியன் வழக்குப்பதிவு செய்து வீடு புகுந்து திருடிய மர்ம நபர்களை தேடி வருகிறார்.