டிராக்டர் கவிழ்ந்து டிரைவர் சாவு

கடையநல்லூர்:

சிவகிரி அருகே உள்ள அம்பேத்கர் தெருவை சேர்ந்தவர் சின்னராசு (வயது 19), டிராக்டர் டிரைவர். இவர் டிராக்டரில் கடையநல்லூர் அருகே உள்ள சாலாப்பேரி குளத்தில் அரசின் முறையாக அனுமதி பெற்று மண் ஏற்றி வந்து கொண்டு இருந்தார். அப்போது, எதிரே வந்த டிராக்டருக்கு வழிவிடுவதற்காக சின்னராசு தனது டிராக்டரை ஒதுக்கினார். ஆனால் எதிர்பாராதவிதமாக சின்னராசு டிராக்டருடன் வயலில் விழுந்தார். இதில் அவர் பலத்த காயம் அடைந்தார். அக்கம்பக்கத்தினர் அவரை மீட்டு சிகிச்சைக்காக கடையநல்லூர் அரசு ஆஸ்பத்திரிக்கு அனுப்பி வைத்தனர். அங்கு அவருக்கு முதலுதவி சிகிச்சை அளிக்கப்பட்டு, மேல் சிகிச்சைக்காக பாளையங்கோட்டை அரசு ஆஸ்பத்திரிக்கு கொண்டு செல்லப்பட்டார். அங்கு சிகிச்சை பலனின்றி சின்னராசு பரிதாபமாக இறந்தார்.

இதுகுறித்து கடையநல்லூர் போலீசார் வழக்குப்பதிவு செய்து விசாரணை நடத்தி வருகின்றனர்.