வீட்டின் ஓட்டை பிரித்து 12 பவுன் நகை, பணம் திருட்டு

குடியாத்தம் அருகே மேலாளத்தூர் மசூதி தெருவை சேர்ந்தவர் முனிராஜ் (வயது 78), இவரது மனைவி கல்யாணி (68), இவர்களுக்கு 2 மகன்கள், ஒரு மகள் உள்ளனர். அவர்கள் திருமணமாகி வெளியூரில் வசித்து வருகின்றனர்.

முனிராஜிம், கல்யாணியும் பகல் நேரத்தில் மட்டும் வீட்டிலிருந்து விட்டு இரவில் அருகே உள்ள மற்றொரு வீட்டில் தூங்குவது வழக்கம். இந்த நிலையில் நேற்று காலை முனிராஜ் வீட்டு கூரையில் ஓடுகள் பிரிக்கப்பட்டு இருப்பதை பார்த்த அக்கம்பக்கத்தினர் உடனடியாக முனிராஜுக்கு தகவல் தெரிவித்தனர்.

அவர் விரைந்து வந்து வீட்டின் கதவை திறந்து உள்ளே சென்று பார்த்தபோது வீட்டின் ஓட்டை பிரித்து மர்ம நபர்கள் உள்ளே இறங்கி பீரோவில் இருந்த 12 பவுன் நகை, ரூ.30 ஆயிரம் மற்றும் அரை கிலோ வெள்ளி பொருட்களை திருடியுள்ளனர்.

இதுகுறித்து தகவல் அறிந்த குடியாத்தம் டவுன் போலீசார் விரைந்து சென்று விசாரணை நடத்தினர். மேலும் திருட்டு சம்பவம் குறித்து விசாரணை நடத்தி வருகின்றனர்.