தேடப்பட்ட தம்பதி கைது

சோழவந்தான்,

சோழவந்தான் அருகே மன்னாடிமங்கலம் ஊராட்சிக்கு உட்பட்ட அய்யப்பன்நாயக்கன்பட்டி கிராமத்தைச் சேர்ந்தவர் அரிச்சந்திரன் (வயது 57). இவருக்கும் அருகில் உள்ள தர்மருக்கும் முன் விரோதம் இருந்து வந்தது. கடந்த 17-ந் தேதி இருவருக்கு வாய் தகராறு ஏற்பட்டது. இதில் தர்மர் மகன் முன்னாள் ராணுவ வீரர் ஜெகன் (36) அரிவாளுடன் வக்கீல் அரிச்சந்திரன், இவரது மனைவி செல்வி, மைத்துனரான முன்னாள் ஒன்றிய கவுன்சிலர் பால்பாண்டி ஆகிய 3 பேரையும் அரிவாளால் வெட்டி உள்ளார். இதில் படுகாயம் அடைந்த 3 பேரும் ஆஸ்பத்திரியில் அனுமதிக்கப்பட்டு சிகிச்சை பெற்று வருகின்றனர்.

இது குறித்து செல்வி காடுபட்டி போலீஸ் நிலையத்தில் புகார் கொடுத்தார்.இதன் பேரில் சோழவந்தான் இன்ஸ்பெக்டர் பால்ராஜு, காடுபட்டி சப் இன்ஸ்பெக்டர் குபேந்திரன் மற்றும் போலீசார் சம்பந்தப்பட்டவர்களை தேடி வந்தனர். இந்நிலையில் ஜெகன் உத்தம்பாளையம் கோர்ட்டில் சரணடைந்தார். தர்மர், அவரது மனைவி பூங்கொடி ஆகியோர் குருவித்துறை அருகே சித்தாதிபுரத்தில் மறைந்திருப்பதாக போலீசாருக்கு ரகசிய தகவல் கிடைத்தது. இதன் பேரில் இன்ஸ்பெக்டர் பால்ராஜு, சப்-இன்ஸ்பெக்டர் குபேந்திரன் மற்றும் போலீசார், அங்கு சென்று இருவரையும் கைது செய்தனர்.