மாற்றுத்திறனாளிகளுக்கு நலத்திட்ட உதவிகள்

விழுப்புரம்:

விழுப்புரம் மாவட்ட கலெக்டர் அலுவலகத்தில் நேற்று முன்தினம் வாராந்திர மக்கள் குறைகேட்பு கூட்டம் நடைபெற்றது. கூட்டத்திற்கு மாவட்ட கலெக்டர் சி.பழனி தலைமை தாங்கி பொதுமக்கள், மாற்றுத்திறனாளிகளிடம் குறைகளை கேட்டறிந்து கோரிக்கை மனுக்களை பெற்றார். முதியோர் உதவித்தொகை, வீட்டுமனைப்பட்டா, ஆதரவற்றோர் உதவித்தொகை, பட்டா மாறுதல், தொழில் தொடங்க கடனுதவி, பிரதம மந்திரியின் வீடு கட்டும் திட்டம், முதல்-அமைச்சரின் பசுமை வீடு திட்டம் உள்ளிட்ட பல்வேறு கோரிக்கைகள் தொடர்பாக 802 பேர் மனுக்களை கொடுத்தனர். இம்மனுக்களை பெற்ற மாவட்ட கலெக்டர் சி.பழனி, இம்மனுக்கள் மீது விரைவில் நடவடிக்கை எடுக்கும்படி சம்பந்தப்பட்ட துறை அதிகாரிகளுக்கு உத்தரவிட்டார். தொடர்ந்து, மாவட்ட மாற்றுத்திறனாளிகள் நலத்துறை சார்பில் ஒரு மாற்றுத்திறனாளிக்கு ரூ.7,500 மதிப்பில் சக்கர நாற்காலியும், மற்றொருவருக்கு ரூ.9,800 மதிப்பில் 3 சக்கர நாற்காலியையும் கலெக்டர் வழங்கினார். மேலும் உழவர் உற்பத்தியாளர் நிறுவனங்களின் கூட்டமைப்பு சார்பில் பாரம்பரிய முறையில் தயாரிக்கப்பட்ட உணவுப்பொருட்கள் விற்பனைக்கு வைக்கப்பட்டுள்ளதை அவர் பார்வையிட்டார்.

இக்கூட்டத்தில் மாவட்ட வருவாய் அலுவலர் பரமேஸ்வரி, மாவட்ட வருவாய் அலுவலர் (நில எடுப்பு) சரஸ்வதி, சமூக பாதுகாப்பு திட்ட தனித்துணை ஆட்சியர் விஸ்வநாதன், விழுப்புரம் கோட்டாட்சியர் பிரவீனாகுமாரி, ஊராட்சிகளின் உதவி இயக்குனர் பொன்னம்பலம், மாவட்ட வழங்கல் அலுவலர் சந்திரசேகர், கூடுதல் போலீஸ் சூப்பிரண்டு ஸ்ரீதரன், மாவட்ட ஆதிதிராவிடர் மற்றும் பழங்குடியினர் நல அலுவலர் வளர்மதி, மாற்றுத்திறனாளிகள் நல அலுவலர் தங்கவேலு உள்பட பலர் கலந்துகொண்டனர்.