தொழிலாளர்களின் வீடுகளை இடித்து காட்டு யானைகள் அட்டகாசம்

வால்பாறையில் பல்வேறு எஸ்டேட் பகுதியில் காட்டு யானை கள் நடமாட்டம் இருந்து வருகிறது. நேற்று முன்தினம் இரவு சக்தி எஸ்டேட் தொழிலாளர்கள் குடியிருப்பு பகுதிக்குள் காட்டு யானைகள் புகுந்தன. அவை, திடீரென்று தொழிலாளர்களின் வீடுகளின் சுவரை இடித்து சேதப்படுத்தி அட்டகாசம் செய்தன.

இதையடுத்து யானைகள், அந்த வீட்டில் இருந்த உணவு பொருட்களை எடுத்து சாப்பிட்டன. பின்னர் வீட்டுக்குள் இருந்த பொருட்களை எடுத்து வீசி சேதப்படுத்தின.

இது குறித்து தகவல் அறிந்த நகராட்சி தலைவர் அழகுசுந்தர வள்ளி அதிகாரிகளுடன் சென்று பாதிக்கப்பட்ட மக்களுக்கு ஆறுதல் கூறினார். மேலும் நகராட்சி நிர்வாகம் சார்பில் நிவாரண பொருட்களை வழங்கினார்.

இதையடுத்து அவர், அந்த பகுதியில் நடமாடும் காட்டு யானைகள் குடியிருப்புக்குள் நுழையாமல் கண்காணிக்கும் படி வனத்துறையினரை கேட்டுக் கொண்டார். அதைத்தொடர்ந்து மழை காரணமாக பாதிக்கப்பட்ட இடங்களையும், அங்குள்ள பள்ளி சத்துணவு கூடங்களையும் பார்வையிட்டு உடனடியாக பராமரிப்பு பணிகளை மேற்கொள்ள அறிவுறுத்தினார்.

இதே போல் வால்பாறையில் மழையால் வீடுகள் சேதமடைந்தவர்களுக்கும் நிவாரண பொருட்களை நகராட்சி தலைவர் வழங்கினார்.