புதிய தாலுகா அலுவலகம் கட்டப்படுமா?

சீர்காழி புதிய பஸ் நிலையம் அருகே பழைய தாலுகா அலுவலக வளாகம் உள்ளது. இந்த அலுவலக வளாகத்தில் தாலுகா அலுவலகம் மட்டுமின்றி சார் கருவூலம், கிளை சிறைச்சாலை, வட்ட வழங்கல் அலுவலகம், புள்ளியல் துறை அலுவலகம், பத்திரப்பதிவு துறை அலுவலகம், ஊராட்சி ஒன்றிய அலுவலகம், உதவி செயற்பொறியாளர் அலுவலகம், அரசு இ-சேவை மையம், ஆதார் மையம் உள்ளிட்ட அலுவலகங்கள் செயல்பட்டு வந்தன.

இந்த கட்டிடம் ஆங்கிலேயர் காலத்தில் கட்டப்பட்டதால் இங்குள்ள கட்டிடங்கள் சேதம் அடைந்தன. இதன்காரணமாக இங்கு செயல்பட்டு வந்த அலுவலகங்கள் கடந்த 4 ஆண்டுகளுக்கு முன்பு சீர்காழி பிடாரி தெற்கு வீதியில் உள்ள ஒரு தனியார் திருமண மண்டபத்திற்கு இடமாற்றம் செய்யப்பட்டு செயல்பட்டு வருகிறது.

புதிய கட்டிடம்

தற்போது அந்த அலுவலக வளாகத்தில் கழிப்பிட வசதி, குடிநீர் வசதி, வாகனங்கள் நிறுத்தும் இடம், ஓய்வறை உள்ளிட்ட அடிப்படை வசதிகள் இல்லாததால் இங்கு வரும் பொதுமக்கள் கடும் அவதிக்குள்ளாகி வருகின்றனர். இங்கு பணியாற்றும் அரசு ஊழியர்களும் சிரமத்தை சந்தித்து வருகின்றனர்.ஆகவே, பழைய தாலுகா அலுவலக வளாகத்தில் உள்ள சேதமடைந்த கட்டிடத்தை இடித்துவிட்டு நவீன வசதிகளுடன் புதிய தாலுகா அலுவலகம் கட்டப்படுமா? என்று பொதுமக்கள் எதிர்பார்க்கின்றனர்.