பஸ் மோதி பெண் பலி

திருப்புல்லாணி அருகே உள்ள வைரவன்கோவில் பகுதியை சேர்ந்தவர் முத்து. இவருடைய மனைவி முத்துநாகாச்சி (வயது 60). கட்டிட கூலித்தொழிலாளி. இவர் நேற்று முன்தினம் வேலைக்கு சென்றுவிட்டு அரசு டவுன்பஸ்சில் வந்து வாணி பஸ் நிறுத்தபகுதியில் இறங்கி தேசிய நெடுஞ்சாலையை கடக்க முயன்றார். அப்போது ராமேசுவரத்திலிருந்து ராமநாதபுரம் நோக்கி வந்த அரசு பஸ் மோதி தலையில் படுகாயமடைந்த முத்துநாகாச்சியை அக்கம்பக்கத்தினர் மீட்டு ராமநாதபுரம் அரசு ஆஸ்பத்திரிக்கு அனுப்பி வைத்தனர். அவரை பரிசோதித்த டாக்டர் அவர் ஏற்கனவே இறந்து விட்டதாக தெரிவித்தனர். இதுகுறித்து முத்துநாகாச்சியின் மகள் வனிதா (35) அளித்த புகாரின் அடிப்படையில் ராமநாதபுரம் கேணிக்கரை போலீசார் வழக்குபதிவு செய்து பஸ் டிரைவர் தூத்துக்குடி மாவட்டம் ஒட்டப்பிடாரம் மேலப்பாண்டியபுரம் ஜோதி வெங்கடேஷ் (48) என்பவரை கைது செய்தனர்.