பாண்டமங்கலம் அருகே மோட்டார்சைக்கிள் மீது கார் மோதி தொழிலாளி பலி டிரைவருக்கு வலைவீச்சு

பரமத்திவேலூர்:

பரமத்திவேலூர் அருகே உள்ள பாண்டமங்கலத்தை சேர்ந்தவர் முருகேசன் (வயது 63). கூலித்தொழிலாளி. இவர் நேற்று நாமக்கல்லில் உள்ள ஒரு மருத்துவமனைக்கு செல்வதற்காக உறவினர் விஜயகுமார் என்பவரது மோட்டார் சைக்கிளில் பின்னால் அமர்ந்து சென்றார். அப்போது பாண்டமங்கலம் அருகே உள்ள கோப்பணம்பாளையம் பகுதியில் சென்றபோது மோட்டார் சைக்கிள் அப்பகுதியில் இருந்த வேகத்தடையில்‌ ஏறி இறங்கியது. அந்தசமயம் பின்னால் வேகமாக வந்த கார் ஒன்று மோட்டார் சைக்கிள் மீது மோதியது.

இதில் பின்னால் அமர்ந்து வந்த முருகேசன் கீழே விழுந்ததில் பின்னால் வந்த கார் அவர் மீது ஏறியதில் படுகாயம் அடைந்தார். உயிருக்கு போராடிய அவரை அந்த வழியாக வந்தவர்கள் மீட்டு வேலூர் அரசு மருத்துவமனையில் சிகிச்சைக்காக சேர்த்தனர். பின்னர் மேல்சிகிச்சைக்காக நாமக்கல் அரசு மருத்துவமனைக்கு அனுப்பி வைக்கப்பட்டார். அங்கு அவரை பரிசோதனை செய்த டாக்டர்கள் வரும் வழியிலேயே முருகேசன் இறந்து விட்டதாக தெரிவித்தனர். இதையடுத்து அவரது உடல் பிரேத பரிசோதனை கூடத்துக்கு அனுப்பி வைக்கப்பட்டது. இதுகுறித்து வேலூர் போலீசார் வழக்குப்பதிவு செய்து தலைமறைவான கார் டிரைவரை தேடி வருகின்றனர்.