மதுபாட்டிலால் தாக்கப்பட்ட தொழிலாளி சாவு

அம்பை:

அம்பையில் மதுபாட்டிலால் தாக்கப்பட்ட தொழிலாளி பரிதாபமாக இறந்தார். இது தொடர்பாக 2 வாலிபர்களை போலீசார் கைது செய்தனர்.

கூலித்தொழிலாளி

நெல்லை மாவட்டம் அம்பை கம்மாளர் பஜனை மடம் தெருவை சேர்ந்தவர் பாக்கியம் மகன் மாயாண்டி (வயது 36). கூலித் தொழிலாளியான இவருக்கு திருமணம் ஆகி 2 குழந்தைகள் உள்ளது.

கடந்த 13-ந் தேதி இவருக்கும், மதுபோதையில் வந்த அதே பகுதியைச் சேர்ந்த கருப்பசாமி மகன் ஸ்ரீராம் கணேஷ் (25), கண்ணன் மகன் விஜய் (22) ஆகியோருக்கும் இடையே தகராறு ஏற்பட்டது.

இதில் ஆத்திரம் அடைந்த அவர்கள் 2 பேரும் மதுபாட்டிலால் மாயாண்டி தலையில் தாக்கியதாக கூறப்படுகிறது.

ஆஸ்பத்திரியில் சாவு

இதில் பலத்த காயமடைந்த மாயாண்டியை அக்கம்பக்கத்தினர் மீட்டு சிகிச்சைக்காக அம்பை அரசு மருத்துவமனைக்கு அனுப்பி வைத்தனர். அங்கு அவருக்கு முதலுதவி சிகிச்சை அளிக்கப்பட்டு, மேல் சிகிச்சைக்காக பாளையங்கோட்டை ஐகிரவுண்டு அரசு ஆஸ்பத்திரிக்கு அனுப்பி வைத்தனர்.

இதுகுறித்து அம்பை போலீசார் வழக்குப்பதிவு செய்து விசாரணை நடத்தி வந்தனர். இந்த நிலையில் ஆஸ்பத்திரியில் தீவிர சிகிச்சை அளித்தும் பலனின்றி மாயாண்டி நேற்று பரிதாபமாக உயிரிழந்தார்.

கொலை வழக்காக மாற்றம்

இதையடுத்து போலீசார் இந்த வழக்கை கொலை வழக்காக மாற்றி, ஸ்ரீராம் கணேஷ், விஜய் ஆகியோரை கைது செய்தனர்.