(செய்திசிதறல்) வாய்க்காலில் மூழ்கி தொழிலாளி பலி

வாய்க்காலில் மூழ்கி தொழிலாளி இறந்தார்.

கூலி தொழிலாளி

மண்ணச்சநல்லூர் மேலக்காவல்கார தெருவை சேர்ந்தவர் பாலு (வயது 52).கூலி தொழிலாளியான இவர் வலிப்பு நோய்க்கு சிகிச்சை பெற்று வந்தார். இந்நிலையில் நேற்று இவர் மண்ணச்சநல்லூரில் உள்ள புள்ளம்பாடி வாய்க்காலில் குளிக்க சென்றார்.

அப்போது, திடீரென அவருக்கு வலிப்பு வந்ததாக தெரிகிறது. இதன் காரணமாக அவர் வாய்க்கால் தண்ணீரில் மூழ்கி உயிரிழந்தார். இதுபற்றி தகவல் அறிந்த மண்ணச்சநல்லூர் போலீசார் சம்பவ இடத்திற்கு சென்று பாலுவின் உடலை மீட்டு பிரேத பரிசோதனைக்காக ஸ்ரீரங்கம் அரசு மருத்துவமனைக்கு அனுப்பி வைத்தனர். மேலும் இது தொடர்பாக வழக்குப்பதிவு செய்து விசாரணை நடத்தி வருகின்றனர்.

மயங்கி விழுந்த முதியவர் சாவு

*திருச்சி புத்தூர் நால்ரோடு பகுதியில் 60 வயதுடைய முதியவர் ஒருவர் மயங்கி கிடந்தார். அந்தவழியாக வந்தவர்கள் அவரை மீட்டு திருச்சி அரசு ஆஸ்பத்திரியில் சேர்த்தனர். அங்கு அவர் சிகிச்சை பலனின்றி பரிதாபமாக உயிரிழந்தார். அவர் யார்? எந்த ஊரை சேர்ந்தவர்? என்று தெரியவில்லை. இதுகுறித்த புகாரின் பேரில் உறையூர் போலீசார் வழக்குப்பதிவு செய்து விசாரித்து வருகிறார்கள்.

மொபட்டுடன் என்ஜினீயர் மாயம்

*திருச்சி எடமலைப்பட்டிபுதூர் பாப்பாகாலனியை சேர்ந்தவர் சீனிவாசன் (33). என்ஜினீயரான இவர் பெங்களூருவில் உள்ள ஒரு ஐ.டி.நிறுவனத்தில் ஊழியராக வேலை பார்த்து வந்தார். இந்த நிலையில் கடந்த 2 ஆண்டுகளாக வேலையில்லாமல் இருந்ததால் வாழ்க்கையில் விரக்தி அடைந்து காணப்படார். சம்பவத்தன்று வீட்டில் இருந்து தனது மொபட்டில் வெளியே சென்ற அவர் பின்னர் வீடு திரும்பவில்லை. அவர் எங்கு சென்றார்? என்ன ஆனார்? என்று தெரியாததால், இதுபற்றி அவருடைய அக்கா ரேவதி எடமலைப்பட்டி புதூர் போலீஸ் நிலையத்தில் புகார் செய்தார். அதன்பேரில் போலீசார் வழக்குப்பதிவு செய்து விசாரணை நடத்தி வருகிறார்கள்.

மோட்டார் சைக்கிள் திருட்டு

* கரூர் மாவுடையான் கோவில் தெருவை சேர்ந்தவர் நவீன்குமார் (23). இவர் மோட்டார் சைக்கிளில் தொட்டியம் மதுரை காளியம்மன் கோவிலுக்கு சாமி கும்பிட வந்தார். மோட்டார் சைக்கிளை கோவிலுக்கு வெளியே நிறுத்திவிட்டு சாமிகும்பிட்டு விட்டு வந்துபார்த்தபோது, மோட்டார் சைக்கிளை காணவில்லை. யாரோ திருடி சென்றுவிட்டனர். இது குறித்த புகாரின் பேரில் தொட்டியம் போலீசார் வழக்குப்பதிவு செய்து விசாரணை நடத்தி வருகின்றனர்.

முதியவர் பிணம்

*தா.பேட்டை பஸ் நிலையம் அருகே மேட்டுப்பாளையம் செல்லும் சாலையோரத்தில் 60 வயது மதிக்கத்தக்க முதியவர் இறந்து கிடந்தார். இதுகுறித்து பிள்ளாதுரை கிராம நிர்வாக அதிகாரி சிவபிரபு கொடுத்த புகாரின் பேரில் தா.பேட்டை போலீசார் வழக்குப்பதிவு செய்து இறந்தவர் யார்? எந்த ஊரை சேர்ந்தவர் என விசாரணை நடத்தி வருகின்றனர்.

விபத்தில் பலி

வையம்பட்டியை அடுத்த வீரமலைப்பட்டியை சேர்ந்தவர் பிச்சை (46). இவர் கோட்டை பூலாம்பட்டி அருகே மோட்டார் சைக்கிளில் சென்று கொண்டிருந்தார். அப்போது, அவர் எதிர்பாராத விதமாக நிலைதடுமாறி கீழே விழுந்தார். இதில் காயம் அடைந்த அவர் திருச்சி அரசு மருத்துவமனையில் அனுமதிக்கப்பட்டு சிகிச்சை பலன் இன்றி இறந்தார். இது குறித்த புகாரின் பேரில் வையம்பட்டி போலீசார் வழக்கு பதிவு செய்து விசாரணை நடத்தி வருகின்றனர்.