முதியவரை அரிவாளால் வெட்டிய வாலிபர் கைது

குளித்தலை அருகே உள்ள கோட்டமேடு பகுதியை சேர்ந்தவர் ராவணன் (வயது 75). இவரது மகனுக்கும், அதே பகுதியைச் சேர்ந்த விக்னேஷ்குமார் (24) என்பவருக்கும் பணம் கொடுக்கல் வாங்கல் தொடர்பாக பிரச்சினை இருந்து வந்துள்ளது. இந்த நிலையில் சம்பவத்தன்று ராவணன் வீட்டில் இருந்தபோது அங்கு சென்ற விக்னேஷ்குமார் மற்றும் அவரது தாயார் சரோஜா ஆகிய 2 பேரும் அவரிடம் தகராறு செய்துள்ளனர். இதில் விக்னேஷ்குமார் தான் கையில் வைத்திருந்த அரிவாளால் ராவணனை வெட்டியுள்ளார். ராவணன் சத்தம் போடவே அருகில் இருந்தவர்கள் வருவதைப் பார்த்த விக்னேஷ்குமார் மற்றும் சரோஜா ஆகிய 2 பேரும் கொலை மிரட்டல் விடுத்து விட்டு அங்கிருந்து தப்பிச் சென்றுள்ளனர். இதில் காயம் அடைந்த ராவணன் குளித்தலை அரசு மருத்துவமனையில் சிகிச்சைக்காக அனுமதிக்கப்பட்டுள்ளார். இதுகுறித்து ராவணன் அளித்த புகாரின் பேரில் விக்னேஷ்குமார் மற்றும் சரோஜா ஆகிய 2 பேர் மீதும் குளித்தலை போலீசார் வழக்கு பதிவு செய்து விக்னேஷ்குமாரை கைது செய்தனர். மேலும் தலைமறைவாக உள்ள சரோஜாவை தேடி வருகின்றனர்.