மக்கள் பணத்தை கொள்ளையடித்து ராஜபோகமாய் வாழும் அரசியல் வியாதிகளுக்கு விடை கொடுப்போம் - கமல்ஹாசன்


மக்கள் பணத்தை கொள்ளையடித்து ராஜபோகமாய் வாழும் அரசியல் வியாதிகளுக்கு விடை கொடுப்போம் - கமல்ஹாசன்
x
தினத்தந்தி 19 March 2021 6:27 AM GMT (Updated: 2021-03-19T12:02:19+05:30)

மக்கள் பணத்தை கொள்ளையடித்து ராஜபோகமாய் வாழும் அரசியல் வியாதிகளுக்கு விடை கொடுப்போம் என மக்கள் நீதி மய்யம் தலைவர் கமல்ஹாசன் தெரிவித்துள்ளார்.

கோவை,

தமிழகத்தில் ஏப்ரல் 6-ம் தேதி ஒரே கட்டமாக சட்டசபை தேர்தல் நடைபெற உள்ளது. தேர்தலில் பதிவாகும் வாக்குகள் மே 2-ம் தேதி எண்ணப்பட்டு அன்றே முடிவுகள் அறிவிக்கப்படுகிறது. 

தேர்தல் தேதி நெருங்கி வருவதால் கட்சிகளுக்கு இடையே கூட்டணி, தொகுதி பங்கீடு இறுதிசெய்யப்பட்டு தேர்தல் அறிக்கை வெளியிடப்பட்டுள்ளன. இதையடுத்து, கட்சிகள் தீவிர பிரசாரத்தில் ஈடுபடத்தொடங்கியுள்ளன.

இத்தேர்தலில் கமல்ஹாசனின் மக்கள் நீதி மய்யம் தலைமையிலான மக்களின் முதல் கூட்டணியில் சமத்துவ மக்கள் கட்சி, இந்திய ஜனநாயக கட்சிகளுக்கு தலா 40 இடங்கள் ஒதுக்கீடு செய்யப்பட்டு உள்ளன. மக்கள் நீதி மய்யத்துக்கு 154 இடங்களில் போட்டியிடுகிறது. இதற்கான வேட்பாளர் பட்டியல் அறிவிக்கப்பட்டுள்ளது. 

அதில் மக்கள் நீதி மய்யம் தலைவர் கமல்ஹாசன் கோவை தெற்கு தொகுதியில் போட்டியிடுகிறது. இதையடுத்து, அவர் கோவை தெற்கு தொகுதியில் தீவிர பிரசாரத்தில் ஈடுபட்டு வருகிறார். மேலும், அவர் தங்கள் கட்சி வேட்பாளர்களை ஆதரித்து பிரசாரத்தில் ஈடுபட்டு வருகிறார். அதுமட்டுமின்றி, அவர் அவ்வப்போது தனது டுவிட்டர் பக்கத்தில் பல்வேறு கருத்துக்களை பதிவிட்டு வருகிறார்.

இந்நிலையில் கமல்ஹாசன் இன்று தனது டுவிட்டர் பக்கத்தில் வெளியிட்ட பதிவில், 

‘வளர்ந்த நாடுகளுக்கு இணையாக தமிழ்நாட்டை உருவாக்க அறிவார்ந்த சமுதாய புரட்சியாலும், அனைவரையும் உள்ளடக்கிய வளர்ச்சியாலும் தமிழ்நாட்டை வளர்ந்த நாடாக மாற்றுவோம்.

மக்களை ஏமாற்றி, அரசியல் பண்ணும் வஞ்சக போக்கையும், மக்களை அடிமையாக்கி, ஏழ்மையாக்கி, கடனாளியாக்கி, மக்கள் பணத்தை கொள்ளையடித்து ராஜபோகமாய் வாழும் அரசியல் வியாதிகளுக்கு விடைகொடுப்போம், தமிழக அரசியல் சாக்கடையை சுத்தப்படுத்த ஒரு நல்ல அடைமழையாய் மாறுவோம் வாருங்கள், நம் எதிர்கால சந்ததிக்கு ஒரு நல்ல, தமிழ் பண்பாட்டு, கலாச்சார பெருமைமிகு தமிழ்நாட்டை உருவாக்குவோம், சீரமைப்போம் தமிழகத்தை’

என தெரிவித்துள்ளார்.



Next Story