இவன் எம்ஜிஆரு பேரன்தான் டா...! சென்னைக்கு மாஸ் என்ட்ரி கொடுத்த பென் ஸ்டோக்ஸ்...!

சென்னை

ஐபிஎல் தொடருக்கு இன்னும் 7 நாட்களே உள்ளது. சென்னை சூப்பர் கிங்ஸ் அணி 3 ஆண்டுகளுக்கு பிறகு சேப்பாக்கம் மைதானத்திற்கு திரும்பி உள்ளதால் ரசிகர்கள் பெரும் எதிர்பார்ப்புடன் காத்து உள்ளனர்.

அனைத்து வீரர்களும் அணியுடன் இணைந்து பயிற்சியில் ஈடுபட்டு வருகின்றனர். இந்தியா - ஆஸ்திரேலியா தொடர் முடிவடைந்த நிலையில் அந்த அணியில் இடம் பெற்றிருந்த ஜடேஜா நேற்று சென்னை சூப்பர் கிங்ஸ் அணியிடன் இணைந்து பயிற்சியை தொடங்கினார்.

இந்த நிலையில் சென்னை சூப்பர் கிங்ஸ் அணியில் இடம் பிடித்துள்ள இங்கிலாந்து வீரர்களான மொயின் அலி மற்றும் பென் ஸ்டோக்ஸ் சென்னை வந்தடைந்தனர். இந்த புகைப்படத்தை சென்னை சூப்பர் கிங்ஸ் அணியின் அதிகாரப்பூர்வ சமூகவலைதள பக்கங்களில் பதிவிட்டுள்ளனர்.

மேலும் சென்னை அணிக்கு புதிதாக களமிறங்கவிருக்கும் பென் ஸ்டோக்ஸ்-க்கு மாஸ் என்ட்ரி கொடுக்கும் வகையில் வீடியோ ஒன்றை சென்னை அணி நிர்வாகம் பதிவிட்டுள்ளது. அதில் சென்னை அணி வீரர்கள் தங்கியிருந்த ஓட்டலுக்கு பென் ஸ்டோக்ஸ் வரும் காட்சிகள் இடம் பெற்றுள்ளது. அவர் நடந்து வரும் போது சென்னை 600028 படத்தில் உள்ள பாடல் பின்னணியில் ஒலிக்க பென் ஸ்டோக்ஸ் மாஸ் என்ட்ரி கொடுத்துள்ளார்.

இந்த வீடியோவும் சமூக வலைதளங்களில் வைரலாகி வருகிறது. இதனை சென்னை ரசிகர்கள் உற்சாகமாக கொண்டாடி வருகின்றனர்.