வங்காளதேச அணிக்கு எதிரான டெஸ்ட்: முதல் இன்னிங்சில் 317 ரன்களில் நியூசிலாந்து ஆட்டமிழப்பு

டாக்கா,

நியூசிலாந்து கிரிக்கெட் அணி வங்காளதேசத்திற்கு சுற்றுப்பயணம் மேற்கொண்டு 2 போட்டிகள் கொண்ட டெஸ்ட் தொடரில் விளையாடுகிறது.இவ்விரு அணிகளுக்கு இடையிலான முதலாவது டெஸ்ட் போட்டி நவம்பர் 28-ந் தேதி தொடங்கியது இதில் டாஸ் வென்ற வங்காளதேச அணியின் கேப்டன் நஜ்முல் ஹொசைன் சாண்டோ பேட்டிங்கை தேர்வு செய்தார்.அதன்படி முதலில் பேட்டிங் செய்த வங்காளதேச அணி முதல் நாள் ஆட்ட நேர முடிவில் 85 ஓவர்களில் 9 விக்கெட் இழப்பிற்கு 310 ரன்கள் எடுத்து இருந்தது. தைஜுல் இஸ்லாம் 8 ரன்களிலும், ஷோரிபுல் இஸ்லாம் 13 ரன்களிலும் களத்தில் இருந்தனர். 2-வது நாள் ஆட்டம் நேற்று நடைபெற்றது. இதில் ஆட்டம் தொடங்கிய முதல் பந்திலேயே வங்காளதேச அணி எஞ்சிய 1 விக்கெட்டையும் இழந்து 310 ரன்கள் எடுத்து ஆல் அவுட் ஆனது. வங்காளதேச அணி தரப்பில் அதிகபட்சமாக மஹ்முதுல் ஹசன் ஜாய் 86 ரன்கள் அடித்தார். நியூசிலாந்து அணி தரப்பில் கிளென் பிலிப்ஸ் 4 விக்கெட்டுகளும், ஜேமிசன், அஜாஸ் படேல் தலா 2 விக்கெட்டுகளும் கைப்பற்றினர்.

இதனை தொடர்ந்து தனது முதல் இன்னிங்சை தொடங்கிய நியூசிலாந்து அணி சீரான இடைவெளியில் விக்கெட்டுகளை இழந்து திணறியது. தொடக்க ஆட்டக்காரர்கள் டாம் லாதம் 21 ரன்களிலும், கான்வே 12 ரன்களிலும் விரைவில் ஆட்டமிழந்தனர். இதன் தொடர்ச்சியாக களமிறங்கிய வில்லியம்சன் மற்றும் ஹென்றி நிக்கோல்ஸ் இருவரில் நிக்கோல்ஸ் 19 ரன்களில் அவுட் ஆனார். அதன்பின் ஜோடி சேர்ந்த வில்லியம்சன் - டேரில் மிட்செல் இணை அணியை சரிவிலிருந்து மீட்டெடுக்க போராடியது. நிலைத்து விளையாடிய இந்த ஜோடியில் டேரில் மிட்செல் 41 ரன்களில் ஆட்டமிழந்தார். அதன்பின் களமிறங்கிய டாம் பிளண்டெல் 7 ரன்களில் வந்த வேகத்திலேயே பெவிலியன் திரும்பினார். வில்லியம்சன் மட்டும் களத்தில் நிலைத்து நின்று விளையாடினார். பின்னர் கை கோர்த்த பிலிப்ஸ் - வில்லியம்சன் ஜோடி அணியை கவுரமான ரன்கள் எடுக்க உதவியது. சிறப்பாக விளையாடிய வில்லியம்சன் சதமடித்து அசத்தினார். பிலிப்ஸ் 42 ரன்கள் அடித்த நிலையில் ஆட்டமிழந்தார். சதமடித்த சிறிது நேரத்திலேயே வில்லியம்சன் ஆட்டமிழந்தார். அவர் 205 பந்துகளில் 104 ரன்கள் அடித்து அணியை சரிவிலிருந்து காப்பாற்றினார். 2-ம் நாள் ஆட்ட நேர முடிவில் நியூசிலாந்து அணி 84 ஓவர்களில் 8 விக்கெட்டுகள் இழப்பிற்கு 266 ரன்கள் எடுத்தது. ஜெமிசன் 7 ரன்னிலும் சவுத்தி 1 ரன்னிலும் களத்தில் இருந்தனர்.

இந்நிலையில் 3-ம் நாள் ஆட்டம் இன்று தொடங்கியது. தொடர்ந்து ஆடிய நியூசிலாந்து அணி 317 ரன்கள் எடுத்து ஆல் அவுட் ஆனது. இதன் மூலம் நியூசிலாந்து அணி 7 ரன்கள் முன்னிலை பெற்றது. வங்காளதேசம் தரப்பில் தைஜுல் இஸ்லாம் 4 விக்கெட்டுகளையும் மோமினுல் 3 விக்கெட்டுகளையும் வீழ்த்தினர்.

இதனையடுத்து வங்காளதேசம் அணி 2-வது இன்னிங்சை தொடங்கி விளையாடி வருகிறது.