பெண்கள் பிரிமீயர் லீக்: முதலாவது வெற்றியை பதிவு செய்வது யார்?...குஜராத்-பெங்களூரு அணிகள் இன்று மோதல்...!

மும்பை,

இந்திய கிரிக்கெட் கட்டுபாட்டு வாரியம் (பி.சி.சி.ஐ) சார்பில் முதலாவது பெண்கள் பிரிமீயர் `லீக்' 20 ஓவர் போட்டி மும்பை, நவி மும்பையில் நடைபெற்று வருகிறது. இதில் மும்பை இந்தியன்ஸ், குஜராத் ஜெய்ன்ட்ஸ், டெல்லி கேப்பிடல்ஸ், ராயல் சேலஞ்சர்ஸ் பெங்களூர், உ.பி.வாரியர்ஸ் ஆகிய 5 அணிகள் பங்கேற்று விளையாடி வருகின்றன.

ஒவ்வொரு அணியும், மற்ற அணிகளுடன் தலா 2 முறை மோத வேண்டும். `லீக்' முடிவில் முதல் இடத்தை பிடிக்கும் அணி நேரடியாக இறுதிப்போட்டியிலும், 2வது மற்றும் 3வது இடங்களை பிடிக்கும் அணிகள் எலிமினேட்டர் சுற்றில் மோதும். அதில் வெற்றி பெறும் அணி இறுதிப்போட்டியில் ஆடும்.

இன்று நடைபெறும் 6-வது `லீக்' ஆட்டம் மும்பை பிராபோர்ன் மைதானத்தில் இன்று இரவு 7.30 மணிக்கு நடக்கிறது. இதில் பெத் மூனி தலைமையிலான குஜராத் அணியும் -ஸ்மிருதி மந்தனா தலைமையிலான ராயல் சேலஞ்சர்ஸ் பெங்களூர் அணியும் மோதுகின்றன.

இரு அணிகளும் தாங்கள் விளையாடிய 2 ஆட்டங்களிலும் தோற்று இருந்தது. இதனால் ஹாட்ரிக் தோல்வியை தவிர்த்து முதல் வெற்றியை பெறுவது எந்த அணி என்று ஆவலுடன் எதிர்பார்க்கப்படுகிறது. குஜராத் அணி மும்பையிடம் 143 ரன் வித்தியாசத்திலும், உ.பி.வாரியர்சிடம் 3 விக்கெட் வித்தியாசத்திலும் தோற்று இருந்தது.

பெங்களூர் அணி 60 ரன் வித்தியாசத்தில் டெல்லியிடமும், 9 விக்கெட் வித்தியாசத்தில் மும்பையிடமும் தோற்றது. 5 போட்டிகள் முடிவில் மும்பை, டெல்லி தலா 4 புள்ளியுடனும், உ.பி.வாரியர்ஸ் 2 புள்ளியுடனும் உள்ளன. பெங்களூர், குஜராத் புள்ளி எதுவும் பெறவில்லை.