உலகக்கோப்பை: சென்னையில் நடைபெற உள்ள இந்தியா- ஆஸ்திரேலியா போட்டிக்கு நாளை டிக்கெட் விற்பனை

சென்னை,

கிரிக்கெட் ரசிகர்கள் ஆவலுடன் எதிர்பார்க்கும் 13-வது உலகக்கோப்பை கிரிக்கெட் தொடர்(50 ஓவர்) அக்டோபர் 5-ந்தேதி முதல் நவம்பர் 19-ந்தேதி வரை இந்தியாவின் 10 நகரங்களில் நடைபெறுகிறது. ஆமதாபாத்தில் உள்ள நரேந்திர மோடி ஸ்டேடியத்தில் நடக்கும் முதல் லீக் ஆட்டத்தில் நடப்பு சாம்பியன் இங்கிலாந்து - நியூசிலாந்து அணிகள் பலப்பரீட்சை நடத்துகின்றன.

அக்டோபர் 8-ந்தேதி சென்னை சேப்பாக்கம் மைதானத்தில் நடக்கும் போட்டியில் இந்தியா-ஆஸ்திரேலியா அணிகள் மோத உள்ளன. இந்த நிலையில் இந்த போட்டிக்கான டிக்கெட் விற்பனை நாளை தொடங்க உள்ளது. நாளை இரவு 8 மணி முதல் டிக்கெட்டுகள் 'புக் மை ஷோ' இணையதளம் மூலம் ஆன்லைனில் விற்பனை செய்யப்படுகின்றன

மாஸ்டர் கார்டு பயனாளர்களுக்கு மட்டும் நேற்றே டிக்கெட் விற்பனை தொடங்கியது. அவர்களுக்கு ஒதுக்கப்பட்ட டிக்கெட்டுகள் மட்டும் விற்பனை செய்யப்பட்டன. தொடங்கிய ஒரு மணி நேரத்தில் டிக்கெட்டுகள்அனைத்தும் விற்று தீர்ந்தன.

ஆமதாபாத்தில் இந்தியா-பாகிஸ்தான் மோதும் லீக் ஆட்டத்துக்கான டிக்கெட்டுகள் வருகிற 3-ந்தேதி விற்கப்பட உள்ளது குறிப்பிடத்தக்கது.