சாம்பியன்ஸ் லீக் கால்பந்து: அரைஇறுதியில் மான்செஸ்டர் சிட்டி

முனிச்,

68-வது ஐரோப்பிய கிளப் அணிகளுக்கான சாம்பியன்ஸ் லீக் கால்பந்து போட்டி பல்வேறு நாடுகளில் நடந்து வருகிறது. இதில் நேற்று முன்தினம் இரவு மான்செஸ்டர் சிட்டி (இங்கிலாந்து)- பேயர்ன் முனிச் (ஜெர்மனி) இடையிலான கால்இறுதியின் 2-வது சுற்று முனிச் நகரில் நடந்தது.

விறுவிறுப்பான இந்த மோதல் 1-1 என்ற கோல் கணக்கில் டிராவில் முடிந்தது. மான்செஸ்டர் வீரர் எர்லிங் ஹாலன்ட் 57-வது நிமிடத்திலும், பேயர்ன் முனிச் வீரர் ஜோஷூவா கிமிச் பெனால்டி வாய்ப்பில் 83-வது நிமிடத்திலும் கோல் அடித்தனர்.

இவ்விரு அணிகள் ஏற்கனவே மோதிய கால்இறுதியின் முதலாவது சுற்றில் மான்செஸ்டர் சிட்டி 3-0 என்ற கணக்கில் வெற்றி பெற்றிருந்தது. இரு ஆட்டங்களின் முடிவையும் சேர்த்து மான்செஸ்டர் சிட்டி 4-1 என்ற கணக்கில் அரைஇறுதிக்கு முன்னேறியது.

அடுத்த மாதம் நடக்கும் அரைஇறுதி ஆட்டங்களில் மிலன்-இன்டர்மிலன் (இத்தாலி), ரியல்மாட்ரிட் (ஸ்பெயின்)- மான்செஸ்டர் சிட்டி அணிகள் சந்திக்கின்றன.