பிரெஞ்சு ஓபன் டென்னிஸ்: நடால், அலெக்ஸாண்டர் ஸ்வெரெவ் கால்இறுதிக்கு முன்னேற்றம்..!

பாரீஸ்,

கிராண்ட்ஸ்லாம் அந்தஸ்து பெற்ற பிரெஞ்சு ஓபன் டென்னிஸ் போட்டி பாரீஸ் நகரில் நடந்து வருகிறது. இதில் ஆண்கள் ஒற்றையர் பிரிவில் ரபேல் நடால், அலெக்ஸாண்டர் ஸ்வெரெவ் ஆகியோர் 4-வது சுற்றில் வெற்றி பெற்று கால்இறுதி போட்டிக்கு முன்னேறினர்.

நேற்று நடைபெற்ற 4-வது சுற்று போட்டியில் 13 முறை சாம்பியனும் ஸ்பெயின் வீரருமான ரபேல் நடால், கனடாவைச் சேர்ந்த பெலிக்ஸ் ஆகர் அலியாசிம் உடன் மோதினார். விறுவிறுப்பாக நடைபெற்ற இந்த போட்டியில் நடால் 3-6, 6-3, 6-2, 3-6, 6-3 என்ற கணக்கில் பெலிக்சை வீழ்த்தி கால்இறுதிக்குள் நுழைந்தார்.

மற்றொரு போட்டியில் ஜெர்மனி வீரர் அலெக்ஸாண்டர் ஸ்வெரெவ், ஸ்பெயின் வீரர் பெர்னாப் ஜபாடா மிரல்லஸ் உடன் மோதினார். இந்த போட்டியில் ஸ்வெரெவ், 7-6 (13-11), 7-5, 6-3 என்ற செட் கணக்கில் ஜபாடாவை வீழ்த்தி கால்இறுதிக்கு முன்னேறினார்.

நாளை நடைபெறும் கால்இறுதி போட்டியில் நடால், நம்பர் 1 வீரரான ஜோகோவிச்சுடன் மோத இருக்கிறார். ஸ்வெரெவ், கார்லஸ் அல்காரசுடன் மோதுகிறார்.