மாட்ரிட்,

மாட்ரிட் ஓபன் சர்வதேச டென்னிஸ் போட்டி ஸ்பெயினில் நடந்து வந்தது. பிரெஞ்சு ஓபனுக்கு முன்னோட்டமாக களிமண் தரையில் நடத்தப்பட்ட இந்த போட்டியின் இறுதிசுற்றில் 2-ம் நிலை வீரரும், நடப்பு சாம்பியனுமான கார்லஸ் அல்காரசும் (ஸ்பெயின்), 65-ம் நிலை வீரர் ஜன் லினர்ட் ஸ்ரப்பும் (ஜெர்மனி) மோதினர்.

ஸ்ரப் தொடக்கம் முதலே கடும் சவால் அளித்த போதிலும் 3 செட் வரை போராடி அல்காரஸ் வெற்றியை வசப்படுத்தினார். 2 மணி 25 நிமிடங்கள் நீடித்த ஆட்டத்தின் முடிவில் அல்காரஸ் 6-4, 3-6, 6-3 என்ற செட் கணக்கில் வாகை சூடி சாம்பியன் கோப்பையை தக்கவைத்தார். 20 வயதான அல்காரசுக்கு இது 10-வது சர்வதேச பட்டமாகும்.

இதன் மூலம் 'ஓபன் எரா ' டென்னிஸ் வரலாற்றில் (1968-ம் ஆண்டில் இருந்து) மிக குறைந்த வயதில் 10 பட்டங்களை வென்றவர்களின் பட்டியலில் 6-வது இடத்தை பிடித்தார். அவருக்கு ரூ.10 கோடி பரிசுத்தொகையுடன் ஆயிரம் தரவரிசை புள்ளிகளும் கிடைத்தது. 2-வது இடத்தை பெற்ற ஸ்ரப் ரூ.5.கோடியே 23 லட்சத்தை பரிசாக பெற்றார்.

அடுத்து ரோம் மாஸ்டர்ஸ் போட்டியில் பங்கேற்பதை உறுதி செய்திருப்பதன் மூலம் அல்காரஸ் டென்னிஸ் தரவரிசையில் மீண்டும் 'நம்பர் ஒன்' இடத்தை பிடிக்கிறார்.