தரநிலையில் இடம் பெறாமல் விம்பிள்டனில் ஒற்றையர் சாம்பியன்: வோன்ட்ரோசோவா புதிய சாதனை.!

லண்டன்,

வோன்ட்ரோசோவா வெற்றி

லண்டனில் நடந்து வரும் 'கிராண்ட்ஸ்லாம்' அந்தஸ்து பெற்ற விம்பிள்டன் டென்னிஸ் போட்டி இறுதி கட்டத்தை எட்டி விட்டது.

இதில் பெண்கள் ஒற்றையர் பிரிவில் நேற்று நடந்த இறுதிப்போட்டியில் உலக தரவரிசையில் 6-வது இடம் வகிக்கும் துனிசியா வீராங்கனை ஆன்ஸ் ஜாபியர், தரவரிசையில் 42-வது இடத்தில் உள்ள மார்கெட்டா வோன்ட்ரோசோவாவை (செக்குடியரசு) எதிர்கொண்டார். விறுவிறுப்பாக அரங்கேறிய இந்த ஆட்டத்தில் 2 செட்களிலுமே முதலில் பின்தங்கி இருந்த வோன்ட்ரோசோவா கடைசி கட்டத்தில் நெருக்கடியை நேர்த்தியாக சமாளித்து அபாரமாக மட்டையை சுழற்றி வெற்றியை தன்வசப்படுத்தினார். 1 மணி 20 நிமிடம் நடந்த இந்த ஆட்டத்தில் வோன்ட்ரோசோவா 6-4, 6-4 என்ற நேர்செட்டில் ஆன்ஸ் ஜாபியருக்கு அதிர்ச்சி அளித்து மகுடம் சூடினார்.

தரநிலையின்றி சாதனை

24 வயது இடக்கை வீராங்கனையான வோன்ட்ரோசோவா வென்ற முதல் கிராண்ட்ஸ்லாம் பட்டம் இதுவாகும். இதற்கு முன்பு அவர் 2019-ம் ஆண்டு பிரெஞ்சு ஓபன் இறுதிப்போட்டியில் தோற்று கோப்பையை கோட்டை விட்டு இருந்தார்.

வழக்கமாக போட்டியில் பங்கேற்கும் 34 பேருக்கு தரநிலை வழங்கப்படும். ேவான்ட்ரோசோவா உலக தரவரிசையில் 42-வது இடத்தில் இருப்பதால் இந்த போட்டியில் தரவரிசையின்றி கலந்து கொண்டார். இருப்பினும் அவர் அபாரமாக செயல்பட்டு முதல்முறையாக விம்பிள்டன் கோப்பையை முத்தமிட்டார். இதன் மூலம் அவர் 'ஓபன் எரா' வரலாற்றில் (1968-ல் இருந்து) போட்டி தரநிலையில் இடம் பெறாமல் விம்பிள்டனில் ஒற்றையர் சாம்பியன் பட்டத்தை வென்ற முதல் வீராங்கனை என்ற சாதனையை படைத்தார்.

ரூ.24½ கோடி பரிசு

கிராண்ட்ஸ்லாம் போட்டியில் 3-வது முறையாக இறுதிப்போட்டிக்குள் நுழைந்த 28 வயது ஆன்ஸ் ஜாபியருக்கு மீண்டும் ஒருமுறை கோப்பை கனவு கைகூடாமல் போனது. இதனால் அவர் ஆட்டம் முடிந்ததும் தோல்வியை தாங்க முடியாமல் கண்ணீர் விட்டார். ஏற்கனவே ஆன்ஸ் ஜாபியர் 2022-ம் ஆண்டு விம்பிள்டன் மற்றும் அமெரிக்க ஓபன் போட்டிகளின் இறுதி சுற்றில் தோல்வி கண்டு ஏமாற்றம் அடைந்து இருந்தார் என்பது நினைவுகூரத்தக்கது.

சாம்பியன் கோப்பையை கையில் ஏந்திய வோன்ட்ரோசோவா ரூ.24½ கோடியை பரிசாக அள்ளினார். தோல்வி அடைந்து 2-வது இடம் பெற்ற ஆன்ஸ் ஜாபியருக்கு ரூ.12¼ கோடி பரிசுத் தொகையாக கிட்டியது.