நியூயார்க்,

'கிராண்ட்ஸ்லாம்' அந்தஸ்து பெற்ற அமெரிக்க ஓபன் டென்னிஸ் போட்டி நியூயார்க் நகரில் நடந்து வருகிறது. இதில் ஆண்கள் இரட்டையர் பிரிவில் நேற்று நடந்த அரைஇறுதியில் இந்தியாவின் ரோகன் போபண்ணா, பிரான்சின் மேத்யூ எப்டென் கூட்டணி 7-6 (7-3), 6-2 என்ற நேர் செட்டில் பிரான்சின் ஹெர்பெர்ட்- நிகோலஸ் மகுட் ஜோடியை வீழ்த்தி இறுதிப்போட்டிக்குள் நுழைந்தது.

முன்னதாக நடந்த ஆண்கள் ஒற்றையர் கால்இறுதியில் நடப்பு சாம்பியனும், தரநிலையில் முதலிடத்தில் இருப்பவருமான கார்லஸ் அல்காரஸ் (ஸ்பெயின்), ஒலிம்பிக் சாம்பியனும், தரவரிசையில் 12-வது இடத்தில் உள்ளவருமான அலெக்சாண்டர் ஸ்வெரேவை (ஜெர்மனி) எதிர்கொண்டார்.

2 மணி 30 நிமிடம் நடந்த இந்த ஆட்டத்தில் அல்காரஸ் 6-3, 6-2, 6-4 என்ற நேர்செட்டில் அலெக்சாண்டர் ஸ்வெரேவ்வை விரட்டியடித்து தொடர்ந்து 2-வது முறையாக அரைஇறுதிக்கு முன்னேறினார். இந்த ஆட்டத்தை இந்திய கிரிக்கெட் அணியின் முன்னாள் கேப்டன் டோனி நேரில் பார்த்து ரசித்தது குறிப்பிடத்தக்கது.