விம்பிள்டன் டென்னிஸ் போட்டி: வீனஸ் வில்லியம்ஸ் அதிர்ச்சி தோல்வி...!!

லண்டன்,

கிராண்ஸ்லாம் போட்டிகளில் ஒன்றான விம்பிள்டன் டென்னிஸ் தொடர் இங்கிலாந்து தலைநகர் லண்டனில் நேற்று தொடங்கி நடைபெற்று வருகிறது.

நேற்று நடந்த முதல் சுற்றில் முன்னாள் நம்பர் 1 வீராங்கனையான வீனஸ் வில்லியம்ஸ் உக்ரைன் வீராங்கனையான சுவிட்டோலினாவை எதிர் கொண்டார் .விறுவிறுப்பாக நடந்த இந்த ஆட்டத்தில் 6-4, 6-3 என்ற நேர் செட் கணக்கில் வீனஸ் வில்லியம்சை தோற்கடித்து சுவிட்டோலினா 2-வது சுற்றுக்கு முன்னேறினார். இதனால் முன்னாள் முன்னாள் நம்பர் ஒன் வீராங்கனையான வீனஸ் வில்லியம்ஸ் (அமெரிக்கா) முதல் சுற்றிலேயே வெளியேறி உள்ளார்.

வீனஸ் வில்லியம்ஸ் 5 முறை விம்பிள்டன் பட்டத்தை வென்றுள்ளார் என்பது குறிப்பிடத்தக்கது.

இந்த தொடரில் நடந்த மற்றொரு முதல் சுற்று ஆட்டத்தில் தரவரிசையில் 7-வது இடத்தில் இருக்கும் அமெரிக்க வீராங்கனையான கோகோ கவூப்பூம் தொடக்க சுற்றிலேயே அதிர்ச்சிகரமாக தோல்வி அடைந்து வெளியேறினார்.அவருடன் மோதிய சக நாட்டைச் சேர்ந்த சோபியா கெனின் 6-4, 4-6, 6-2 என்ற கணக்கில் கோகோ கவூப்பை வீழ்த்தினார்.

பெண்கள் ஒற்றையர் பிரிவில் நடந்த மற்ற ஆட்டங்களில் முதல்நிலை வீராங்கனையான இகாஸ்வியா டெக் (போலந்து), 4-வது வரிசையில் உள்ள பெகுலா (அமெரிக்கா), கரோலினோ கார்சியா (பிரான்ஸ்) ஆகியோர் வெற்றி பெற்று 2-வது சுற்றுக்கு தகுதி பெற்று உள்ளனர்.