மீனம் - தமிழ் மாத ஜோதிடம்

ஆனி மாத ராசி பலன்கள் 15-06-2022 முதல் 16-07-2022 வரை

வசீகரத் தோற்றமே வாழ்க்கையின் வெற்றி என்று சொல்லும் மீன ராசி நேயர்களே!

ஆனி மாதக் கிரக நிலைகளை ஆராய்ந்து பார்க்கும் பொழுது, மாதத் தொடக்கத்தில் உங்கள் ராசிநாதன் குரு, செவ்வாயோடு இணைந்து சனியால் பார்க்கப்படுகிறார். எனவே ஆரோக்கியத் தொல்லை அதிகரிக்கும். வீண் விரயங்களும் உண்டு.

ரிஷப - சுக்ரன் சஞ்சாரம்

ஆனி 4-ந் தேதி, ரிஷப ராசிக்கு சுக்ரன் செல்கிறார். உங்கள் ராசிக்கு 3, 8 ஆகிய இடங்களுக்கு அதிபதியானவர் சுக்ரன். உங்கள் ராசிநாதன் குருவிற்கு சுக்ரன் பகை கிரகம். எனவே அவர் சகாய ஸ்தானத்தில் சஞ்சரிக்கும் போது, பிரச்சினைகள் அதிகரிக்கலாம். மன அமைதி குறையும். கொடுத்த வாக்கைக் காப்பாற்ற இயலாது. தொழிலில் சில இழப்புகளைச் சந்திக்க நேரிடும். விழிப்புணர்ச்சியோடு செயல்பட வேண்டிய நேரம் இது.

மிதுன - புதன் சஞ்சாரம்

ஆனி 11-ந் தேதி, மிதுன ராசிக்கு புதன் செல்கிறார். இக்காலம் ஒரு இனிய காலமாக அமையும். 4-ம் இடத்தில் புதன் பலம் பெறும் பொழுது கல்வியில் இருந்த தடை அகலும். பயணங்கள் அதிகரிக்கும். பக்குவமாகப் பேசி காரியங்களை சாதித்துக் கொள்வீர்கள். சொத்துக்களால் ஆதாயம் உண்டு. ஆரோக்கியத் தொல்லை அகலும். நண்பர்களின் ஆதரவோடு முயற்சிகளில் வெற்றி காண்பீர்கள். சுபகாரியப் பேச்சுக்கள் முடிவாகும்.

மேஷ - செவ்வாய் சஞ்சாரம்

ஆனி 12-ந் தேதி, மேஷ ராசிக்கு செவ்வாய் செல்கிறார். சனியின் பார்வையில் இருந்து செவ்வாய் விடுபடுவதாலும் தனாதிபதி செவ்வாய் தன ஸ்தானத்திற்கு வருவதாலும் பொருளாதார நிலை உயரும். கடன்களை அடைத்து மகிழ்வீர்கள். பணிபுரியும் இடத்தில் உங்களுக்கு நல்ல பெயர் கிடைக்கும். திட்டமிட்ட காரியங்களை திட்டமிட்டபடியே செய்து முடிப்பீர்கள். பிறருக்கு பொறுப்பு சொல்லி வாங்கிக் கொடுத்த தொகை வந்து சேரலாம்.

கடக - புதன் சஞ்சாரம்

ஆனி 28-ந் தேதி, கடக ராசிக்குப் புதன் செல்கிறார். கல்வி ஸ்தானாதிபதி பஞ்சம ஸ்தானம் செல்லும் பொழுது பிள்ளைகளின் முன்னேற்றம் சிறப்பாக இருக்கும். அண்ணன் - தம்பிகளுக்குள் பாகப்பிரிவினைகள் சுமுகமாக முடியும். வாழ்க்கைத் துணைக்கு வேலை கிடைத்து வருமானம் வரலாம்.

மிதுன - சுக்ரன் சஞ்சாரம்

ஆனி 29-ந் தேதி, மிதுன ராசிக்கு சுக்ரன் செல்கிறார். அஷ்டமாதிபதி சுக்ரன் சுக ஸ்தானத்திற்கு வரும் இந்த நேரம் ஆரோக்கியத் தொல்லைகள் அதிகரிக்கும். குடும்பத்தில் மருத்துவச் செலவு வரலாம். தொழில் வளர்ச்சியில் குறுக்கீடு ஏற்படும். நண்பர்களை நம்பி ஒப்படைத்த பொறுப்புகள் மீண்டும் உங்களிடமே திரும்பி வரக்கூடும். பொதுவாழ்வில் வீண்பழிகள் வரலாம். இக்காலத்தில் எதையும் ஒருமுறைக்குப் பலமுறை யோசித்து செய்வதே நல்லது.

இம்மாதம் நடராஜர் வழிபாட்டை நம்பிக்கையோடு செய்வது நல்லது.

பணத்தேவையைப் பூர்த்தி செய்யும் நாட்கள்:-ஜூன்: 15, 16, 20, 21, 26, 27, ஜூலை: 1, 2, 12, 13, 14மகிழ்ச்சி தரும் வண்ணம்:- நீலம்.

பெண்களுக்கான பலன்கள்

இம்மாதம் உங்கள் ராசியை சனி பார்ப்பதால் ஆரோக்கியத்தில் கவனம் செலுத்துங்கள். பொறுமையும், நிதானமும் தேவைப்படும் மாதம் இது. கணவன் - மனைவிக்குள் அன்பும், அரவணைப்பும் அதிகரிக்கும். செவ்வாய் பெயர்ச்சிக்குப் பிறகு பொருளாதாரப் பற்றாக்குறை அகலும். பிள்ளைகளை உங்கள் மேற்பார்வையில் வைத்துக் கொள்வது நல்லது. பணிபுரியும் இடத்தில் சில பிரச்சினைகள் வரலாம். திறமைக்குரிய அங்கீகாரம் கிடைப்பது அரிது.