மெல்போர்ன்,

'கிராண்ட்ஸ்லாம்' என்ற உயரிய அந்தஸ்து பெற்ற ஆஸ்திரேலிய ஓபன் டென்னிஸ் போட்டி மெல்போர்னில் நடந்து வருகிறது. இதில் ஆண்கள் ஒற்றையர் பிரிவின் 2வது சுற்று ஆட்டங்கள் நேற்று நடைபெற்றன. இதில் ஒரு ஆட்டத்தில் முன்னணி வீரரான செர்பியாவின் நோவக் ஜோகோவிச், போர்ச்சுகலின் ஜெய்ம் பாரியா உடன் மோதினார்.

விறுவிறுப்பாக நடைபெற்ற இந்த ஆட்டத்தில் 6-1, 6-7 (4-7), 6-3, 6-2 என்ற செட் கணக்கில் ஜெய்ம் பாரியாவை வீழ்த்திய ஜோகோவிச் 3வது சுற்றுக்கு முன்னேறினார். இதே பிரிவில் நேற்று நடைபெற்ற மற்றொரு ஆட்டத்தில் ஸ்பெயினின் கார்லஸ் அல்காரஸ், ஜப்பானின் யோஷிஹிட்டோ நிஷியோகா உடன் மோதினார்.

இந்த போட்டியில் தொடக்க முதலே ஆதிக்கம் செலுத்திய அல்காரஸ் 6-0, 6-1, 6-4 என்ற செட் கணக்கில் யோஷிஹிட்டோ நிஷியோகாவை எளிதில் வீழ்த்தி 3வது சுற்றுக்கு முன்னேறினார்.