வினய் நடித்துள்ள 'மர்டர் லைவ்' படத்தின் பர்ஸ்ட்லுக் போஸ்டர் வெளியானது..!

சென்னை,

இயக்குனர் முருகேஷ் இயக்கத்தில் நடிகர் வினய் ராய் கதாநாயகனாக நடித்துள்ள திரைப்படம் 'மர்டர் லைவ்'. இந்த படத்தில் அவருக்கு ஜோடியாக கன்னட நடிகை ஷர்மிளா மாண்ட்ரே நடித்துள்ளார். மேலும் ஹாலிவுட் நடிகை நவோமி வில்லோ முக்கிய வேடத்தில் நடித்துள்ளார். பிரசாந்த் டி.மிஸாலே ஒளிப்பதிவு செய்துள்ள இந்த படத்திற்கு ஹிதேஷ் மஞ்சுநாத் இசையமைத்திருக்கிறார். மதன் படத்தொகுப்பு செய்கிறார்.

சைக்கோ கிரைம் திரில்லர் வகை கதையம்சம் கொண்ட இந்த திரைப்படத்தை டாட் காம் எண்டர்டெய்ன்ட் லிமிடெட் நிறுவனம் தயாரித்துள்ளது. இந்த படத்தின் படப்பிடிப்பு நிறைவடைந்து இறுதி கட்டப் பணிகள் விறுவிறுப்பாக நடைபெற்று வருகின்றன. இந்த நிலையில் 'மர்டர் லைவ்' படத்தின் பர்ஸ்ட் லுக் போஸ்டரை படக்குழு வெளியிட்டுள்ளது. விரைவில் சிங்கிள் ட்ராக் மற்றும் டீசர் வெளியாகும் என தெரிவிக்கப்பட்டுள்ளது. இந்த போஸ்டர் தற்போது இணையத்தில் வைரலாகி வருகிறது.

இந்த படம் குறித்து இயக்குனர் முருகேஷ் கூறும்போது, "நிக்கோ மாஸ்டோராகிஸ் இயக்கத்தில் வெளியான 'டாட் காம் பார் மர்டர்' என்ற ஆங்கில படத்தை தழுவி 'மர்டர் லைவ்' திரைப்படம் உருவாகி உள்ளது. இந்த படத்தின் திரைக்கதை புதுமையாகவும், ஸ்டைலிஷாகவும் இருக்கும். ஒரு சைக்கோ கொலையாளிக்கும், நான்கு பெண்களுக்கும் இடையே நிகழும் சம்பவங்களை மையமாக கொண்டு இந்த படத்தின் திரைக்கதை அமைக்கப்பட்டுள்ளது.

இந்த திரைப்படம் முழுவதும் இங்கிலாந்தில் நவீன தொழில்நுட்பத்தை பயன்படுத்தி படமாக்கப்பட்டுள்ளது. படத்தின் நாயகன் கம்ப்யூட்டர் மூலமாகவோ, இன்டர்நெட் மூலமாகவோ உலகின் எந்தப் பகுதியிலும் ஊடுருவி அதிர்ச்சியூட்டும் சம்பவங்களை அரங்கேற்றுவார்'' என்று கூறினார்.