குமுளிக்கு சுற்றுலா வந்தபோது வெளிநாட்டு பெண்ணிடம் பணம், கேமரா திருடிய முதியவர் கைது

குமுளி

ஜெர்மனி நாட்டை சேர்ந்த பென்னீஸ் என்ற பெண், கடந்த ஜனவரி மாதம் 8–ந் தேதி குமுளிக்கு சுற்றுலா வந்தார். பின்னர் அவர், குமுளி–தேக்கடி சாலையில் உள்ள ஒரு தங்கும் விடுதியில் தங்கியிருந்தார். அப்போது அவர் தங்கியிருந்த அறைக்குள் புகுந்த மர்மநபர், ரூ.1 லட்சத்து 40 ஆயிரம் மற்றும் கேமரா ஆகியவற்றை திருடி கொண்டு தப்பி சென்றார். இதுகுறித்து அந்த பெண், குமுளி போலீசில் புகார் செய்தார். அதன்பேரில் போலீசார் விசாரணை நடத்தி வந்தனர்.

இந்தநிலையில் ஒரு திருட்டு வழக்கு தொடர்பாக தமிழ்நாடு சேலம் மாவட்டம் பள்ளப்பட்டி பகுதியில் மைசூரு ஜீ.வி.நகரை சேர்ந்த ஹரீஷ் (வயது 62) என்பவரை பள்ளப்பட்டி போலீசார் கைது செய்தனர். அவரிடம் விசாரணை நடத்தியபோது, குமுளியில் உள்ள தங்கும் விடுதியில் வைத்து ஜெர்மனி நாட்டை சேர்ந்த பெண்ணிடம் கேமரா, பணம் ஆகியவற்றை திருடியதாகவும் கூறியுள்ளார்.

இதுகுறித்து குமுளி போலீசாருக்கு, அவர்கள் தகவல் கொடுத்தனர். இதையடுத்து குமுளி போலீசார் அங்கு சென்று ஹரீசை கைது செய்து குமுளிக்கு அழைத்து வந்து விசாரணை நடத்தினர். அப்போது அவர், குமுளிக்கு சுற்றுலா வந்த ஜெர்மனி நாட்டு பெண்ணிடம் கேமரா மற்றும் பணத்தை திருடியதை ஒப்புக் கொண்டார்.

இதுகுறித்து வழக்குப்பதிவு செய்த போலீசார் அவரை கைது செய்தனர். பின்னர் கோர்ட்டில் ஆஜர்படுத்தப்பட்ட அவர் சிறையில் அடைக்கப்பட்டார்.