தஞ்சையில் துணிகரம்: தனியார் ஆஸ்பத்திரி ஊழியர் வீட்டில் 15 பவுன் நகை திருட்டு

தஞ்சாவூர்,

தஞ்சை மானோஜிப்பட்டியில் உள்ள காமாட்சி நகரை சேர்ந்தவர் அருமைராஜ். தனியார் ஆஸ்பத்திரியில் லேப்டெக்னீஷியனாக பணியாற்றி வருகிறார். சம்பவத்தன்று இவர் வீட்டைப்பூட்டி விட்டு குடும்பத்துடன் திருக்காட்டுப்பள்ளி அருகே உள்ள விஷ்ணம்பேட்டையில் உறவினர் வீட்டு துக்க நிகழ்ச்சியில் பங்கேற்க சென்றிருந்தார். பின்னர் துக்க நிகழ்ச்சியை முடித்துக்கொண்டு நேற்று முன்தினம் இரவு வீட்டிற்கு திரும்பினார். அப்போது வீட்டின் முன்பக்க கதவின் பூட்டு உடைக்கப்பட்டு கிடப்பதை பார்த்து அதிர்ச்சி அடைந்தார். மேலும் வீட்டிற்குள் சென்று பார்த்த போது அங்கு இருந்த பீரோவும் உடைக்கப்பட்டு அதில் இருந்த 15 பவுன் நகைகளும் காணவில்லை.

வலைவீச்சு

வீட்டில் ஆள் இல்லாததை அறிந்த மர்ம நபர்கள் வீட்டின் பூட்டை உடைத்து நகைகளை திருடிச்சென்றது தெரிய வந்தது. திருட்டு போன நகைகளின் மதிப்பு ரூ.3 லட்சம் இருக்கும் என்று கூறப்படுகிறது. இது குறித்து அருமைராஜ், தஞ்சை மருத்துவகல்லூரி போலீசில் புகார் செய்தார். புகாரின் பேரில் போலீசார் சம்பவ இடத்திற்கு சென்று விசாரணை நடத்தினர். மேலும் இதுகுறித்து வழக்குப்பதிவு செய்து நகையை திருடிச்சென்ற மர்ம நபர்களை போலீசார் வலைவீசி தேடி வருகிறார்கள்.