தூத்துக்குடிக்கு நாளை வரும் மு.க.ஸ்டாலினுக்கு சிறப்பான வரவேற்பு அளிக்க வேண்டும் தி.மு.க. பிரதிநிதிகள் கூட்டத்தில் தீர்மானம்

தூத்துக்குடி,

தூத்துக்குடிக்கு நாளை வருகை தரும் மு.க.ஸ்டாலினுக்கு சிறப்பான வரவேற்பு அளிக்க வேண்டும் என்று தி.மு.க. பிரதிநிதிகள் கூட்டத்தில் தீர்மானம் நிறைவேற்றப்பட்டது.

தூத்துக்குடி– எட்டயபுரம் ரோட்டில் உள்ள கலைஞர் அரங்கில் தூத்துக்குடி மாநகர தி.மு.க. பிரதிநிதிகள் கூட்டம் நேற்று நடந்தது. இந்த கூட்டத்திற்கு மாநகர அவைத் தலைவர் ஆறுமுகம் தலைமை தாங்கினார். பொதுக்குழு உறுப்பினர் ஜெகன் முன்னிலை வகித்தார். கீதாஜீவன் எம்.எல்.ஏ., மாநகர செயலாளர் ஆனந்தசேகரன் ஆகியோர் சிறப்பு அழைப்பாளர்களாக கலந்து கொண்டு பேசினார்கள்.

கூட்டத்தில், மறைந்த தி.மு.க. மாவட்ட செயலாளர் என்.பெரியசாமியின் படத்திறப்பு விழா நாளை (திங்கட்கிழமை) நடக்கிறது. இந்த நிகழ்ச்சிக்கு வரும் தி.மு.க. செயல்தலைவர் மு.க.ஸ்டாலினை சிறப்பாக வரவேற்க வேண்டும் என்பன உள்பட பல்வேறு தீர்மானங்கள் நிறைவேற்றப்பட்டன.

இந்த கூட்டத்தில் மாவட்ட நிர்வாகிகள் ராஜ்மோகன் செல்வின், சுசீ, ரவீந்திரன், தலைமை செயற்குழு உறுப்பினர்கள் திருசிற்றம்பலம், ஜெயக்குமார் ரூபன், பொதுக்குழு உறுப்பினர்கள் கோட்டு ராஜா, கணேசன், மாநகர நிர்வாகிகள் முருகேசன், கனகராஜ், நிர்மலா மற்றும் பலர் கலந்து கொண்டனர்.