கூடுதல் பஸ்கள் இயக்க கோரி மாணவர்கள் சாலை மறியல்

செங்கம்,

செங்கம் அருகே நாகப்பாடியில் அரசு தொழில்நுட்ப கல்லூரி இயங்கி வருகிறது. இதில் 900 மாணவர்கள் படித்து வருகின்றனர். இவர்கள் திருவண்ணாமலை மாவட்டத்தில் இருந்து பல்வேறு இடங்களில் இருந்து வருகின்றனர். கல்லூரிக்கு நேரத்திற்கு செல்ல பஸ்கள் இயக்கப்படவில்லை என்று கூறப்படுகிறது.

இதனால் மாணவர்கள் நேற்று திடீரென கல்லூரி முன்பு செங்கம்– போளூர் சாலையில் மறியலில் ஈடுபட்டனர்.

இதுகுறித்து மாணவர்கள் கூறுகையில், ‘கூடுதல் பஸ்கள் இல்லாததால் கல்லூரிக்கு செல்ல முடியவில்லை. இதுகுறித்து திருவண்ணாமலை, செங்கம், போளூர் பணிமனைகளில் பலமுறை புகார் தெரிவித்தும் நடவடிக்கை எடுக்கப்படவில்லை. எனவே கல்லூரிக்கு செல்ல கூடுதலாக பஸ்கள் இயக்க வேண்டும்’ என்றனர்.

இதுகுறித்து தகவல் அறிந்த புதுப்பாளையம் போலீசார் சம்பவ இடத்திற்கு சென்று மாணவர்களிடம் பேச்சுவார்த்தை நடத்தினர். கூடுதல் பஸ்கள் இயக்க நடவடிக்கை எடுக்கப்படும் என்று போலீசார் தெரிவித்தனர். இதையடுத்து மாணவர்கள் கலைந்து சென்றனர். இந்த சாலை மறியலால் சுமார் ½ மணி நேரம் போக்குவரத்து பாதிக்கப்பட்டது.