நீட் தேர்வை ரத்து செய்யக்கோரி தஞ்சையில் மாணவர்கள் 4-வது நாளாக போராட்டம்

தஞ்சாவூர்,

தமிழகத்தில் நீட் தேர்வை ரத்து செய்யக்கோரியும், நீட் தேர்வுக்கு எதிராக போராடிய மாணவி அனிதா தற்கொலை குறித்து நீதி விசாரணை நடத்தக்கோரியும் தமிழகம் முழுவதும் போராட்டங்கள் நடைபெற்று வருகின்றன. தஞ்சையிலும் பல்வேறு அரசியல் கட்சியினர், கல்லூரி மாணவர்கள் போராட்டத்தில் ஈடுபட்டு வருகிறார் கள்.

தஞ்சை சரபோஜி கல்லூரி, குந்தவை நாச்சியார் அரசு மகளிர் கல்லூரி மற்றும் பல்வேறு கல்லூரிகளை சேர்ந்த மாணவ, மாணவிகள் வகுப்புகளை புறக்கணித்து தர்ணா, மறியல், ஊர்வலம், ஆர்ப்பாட்டம் போன்ற போராட்டத்தில் ஈடுபட்டனர். நேற்று 4-வது நாளாகவும் கல்லூரி மாணவர்கள் போராட்டத்தில் ஈடுபட்டனர்.

ஆர்ப்பாட்டம்

தஞ்சை பழைய பஸ் நிலையம் எதிரே மாணவர்கள் கூட்டமைப்பு சார்பில் நேற்று மதியம் ஆர்ப்பாட்டம் நடைபெற்றது. ஆர்ப்பாட்டத்தில் தமிழ்நாடு மாணவர் இயக்க பொதுச்செயலாளர் பிரபாகரன், தமிழக மாணவர் கூட்டமைப்பு ஒருங்கிணைப்பாளர் பாரிமைந்தன், தமிழ்ப்பல்கலைக்கழக மாணவர் பிரதிநிதி ஜான்வின்சென்ட், நாட்டார் கல்லூரி அஜீத், அப்பாஸ், ராஜூ, நவான் மற்றும் பல்வேறு கல்லூரிகளை சேர்ந்த மாணவர்கள் கலந்து கொண்டனர். போராட்டத்தில் கலந்து கொண்டவர்கள் நீட்தேர்வை உடனடியாக ரத்து செய்ய வேண்டும். கல்வியை பொது பட்டியலில் இருந்து மாநில பட்டியலுக்கு மாற்ற வேண்டும் என கூறி கோஷங்கள் எழுப்பினர். பின்னர் அவர்கள் கலைந்து சென்றனர்.