கடலில் எல்லை தாண்டி மீன்பிடித்ததாக கோட்டைப்பட்டினம் மீனவர்கள் 4 பேர் சிறைபிடிப்பு

கோட்டைப்பட்டினம்,

புதுக்கோட்டை மாவட்டம் கோட்டைப்பட்டினம் பகுதியில் இருந்து நேற்று முன்தினம் அதிகாலை 150-க்கும் மேற்பட்ட விசைப்படகுகளில் 800-க்கும் மேற்பட்ட மீனவர்கள் கடலில் மீன்பிடிக்க சென்றனர். இதில் கோட்டைப்பட்டினம் பகுதியை சேர்ந்த செல்வமணி என்பவருக்கு சொந்தமான விசைப்படகில் சென்ற அதே பகுதியை சேர்ந்த தமிழ்செல்வன்(வயது 55), அப்பாத்துரை(52), ரங்கசாமி(45), ஜீவா(55) ஆகிய 4 மீனவர்களும் கடலில் மீன் பிடித்து கொண்டிருந்தனர்.

அப்போது அங்கு ரோந்து பணியில் ஈடுபட்ட இலங்கை கடற்படையினர், தமிழ்செல்வன் உள்ளிட்ட 4 மீனவர்கள் இருந்த விசைப்படகு அருகே வந்தனர். இதையடுத்து எல்லை தாண்டி வந்து மீன் பிடித்ததாக கூறி, 4 மீனவர்களையும் கைது செய்து, விசைப்படகுடன் இலங்கையில் உள்ள காங்கேயன் ராணுவ துறைமுகத்திற்கு கொண்டு சென்றனர். அங்கு அவர்களிடம் விசாரணை மேற்கொண்டு வருகின்றனர்.

மீனவர்கள் 4 பேர் இலங்கை கடற்படையினரால் கைது செய்யப்பட்ட சம்பவம் கோட்டைப்பட்டினம் பகுதியில் பரபரப்பை ஏற்படுத்தி உள்ளது.